أبي كلام حلو ؟

مليت مليت ومليت صار لي شهرين بعيده عن زوجي وكل ما قلته قولي كلام حلو يقول أنا ما أعرف ولا يتهرب ولا يقول هذه سوالفكم يا البنات كل تبون اشياء رومانسية عبالكم عايشيين فيلم  .

اي شنو الغلط اني اعيش هذه اللحظة وأتخيل نفسي البطله وعايشة قصة حب يعني ما يبون ان يكون عندنا احساس بعد لازم الريال يتعلم يصير رومانسي في أوقات يطرش حق زوجته هديه او رسائل حب أويطرش لها شعر ولا أغنية ولا حتى مسج حب علشان المرأه تحس بكيانها ورومانسيتها 

يعني تزوجتنا خلاص ما في رومانسية لو أدري كنت غيرت رأي وعنست .

يعني مو المفروض الزواج يقوي الحب والعلاقات ويخلي الريال والمرأه أكثر رومانسية أنا شايفة العكس بالخطبه ياهو كلام حلو ومسجات وورود وسوالف بس تزوجوا خلاص اعدام للرومانسية .

الرومانسية مرات تكون كافية بكلمه حلوه تحسس فيها زوجتك انك تحبها صدقوني راح تملكون العالم كله .

بس شبابنا عيب يصيرون رومانسيين بعد الزواج شنو هالتفكير المتخلف عيل متى يوم صرنا عيايز يعني .

أنا أقترح دورات للشباب المتزوج واللي مقبل على الزواج يعلمهم كيف تكون رومانسي مع زوجتك صدقوني كل الحريم بتشرك ريايلها بس ما يمنع ان في البعض وهم قله رومانسيين يعني لو أكون محتاجة كلام حلو شنو أسوي ؟؟؟؟؟؟؟؟؟؟

مرات زوجي يسألني أوكي انتي شنو نوعية الكلام اللي تبينه أقوله قولي انك مشتاق لي مو قادر تعيش بدوني حسسني بأهميتي بنسبة لك 

يقعد يقول أوكي ويردد نفس الكلام وأعصب لأنه هذا كلامي أنا أبي كلام من قلبه بأسلوبه حتى لو ما يعرف أي شيء راضيه .

ترى الحريم مخلوق سمعي يحب يسمع الكلام الحلو .

أقول  لكل الحريم اللي حالتهم مثل حالتي ترى عندنا حقوق وأنا أطالب بحقوقي من حيث الكلام الحلو ومن حقي اني اتخيل نفسي بطله الفيلم أو القصة ومن واجبك تحسسني اني ملكة متعرشه على قلبك . 

حمله بسنا نكد صيروا رومانسيين وإذا يا الريايل ما تعرفون روحوا شوفوا فيلم أبيض و أسود ولا فيلم هندي .