الأحد، 29 أغسطس 2010

ما أجمل العودة



هلا أشتقت لكل متابعين مدونتي واللي افتقدوني 

طبعا رحلتي كانت متعبة خاصة انها برمضان 

لكن وااايد استانست كانت رحلتي من الكويت لتورنتو 

حلوه خاصة ان أكتشفت أماكن جديدة وشفت المهرجان  وتونسنا بأماكن جديدة وجوه جديده .

ثم سافرت لمونتريال وهناك هم كان وناسه مع ان أغلب وقتي بالأسواق صج حريم ندور السوق وين ما كان بس الأجواء كانت جميله والجو رهيب مع الأمطار الخفيفة .

 بس مع ان صايمين و رمضان بس دورتهم بالسوق عدل
تدرون العيد لازم نتشرى ونغير جو اذا ضايق خلقي بس أشتري حتى لو مو حقي أرتاح نفسيا بس أصرف فلوس 
ما أدري كل الحريم مثلي وبس أنا ؟ 
عندهم هواية صرف الفلوس .


المهم وبعد مونتريال رحنا دبي قعدت 4 أيام في فندق صغير بس كان حلو وجيد وكل شيء حولي كان اسمه جرانديور 
أسعار حلوه والخدمة حلوة . 

الحلو اني شفت أختي وعيالها وبنات خالي وعماتي وخوالي ويدتي يعني كل حبايبي شفتهم وتونست معاهم .

وأختي ما قصرت ما خلت مكان ما ودتني بس هالمرة شرطت سوق ما أبي طبعا شبعت من السوق بكندا اما بدبي قلت لهم ابي شيء ترويحي ضحكوا علي لأنهم ما عندهم شيء اسمه ترويحي حياتهم كله بالسوق .

هم رحت سوق ما في شيء ترويحي بس في اماكن بالسوق ترويحية مثل الاكواريوم والنافورة وغيرها .
المهم ونسنا عمرنا و اليهال استانسوا .

وأخيرا عدت للكويت لديرتي الحبية ومجرد خروجي من الطائرة صدمني الرطوبة الفضيعة اللي حتى بدبي كان الجو حلو والرطوبة أخف .

لكن الحمدالله رطوبة الكويت ولا ثلج كندا . 

الموقف اللي ضحكني ان زوجي كل ما يبي يشيل الجنط للمطار للسفرة ريلي يشوف الجنط ويتحلطم يقول مسافره 10 أيام و جنطج حق شهر مسكين وايد تعب مع الجنط خاصة ان أول السفره كانت خفيفة وكل ما سافرنا مكان زاد الوزن . 
بس شنو نسوي لازم نشتري ونصرف ولا ماتطلع السفره حلوه .

حبيت أسلم عليكم بعد وصولي 
ومبارك عليكم باقي الشهر ولو انها متأخره شوي  .

هناك 18 تعليقًا:

Katkoota xD يقول...

الحمدالله ع السلامه

تو ما نورت الكويت

علينا و عليج

تحياتي ^.^

Summer يقول...

welcome back 7ayati ;**

غير معرف يقول...

الحمدلله على السلامة :)

mazyona يقول...

هلا كتكوتة
الكويت منورة فيكم
تسلمين

mazyona يقول...

هلا سمر
مشكورة على المرور

mazyona يقول...

هلا حنون
سميتي شرفتي المدونة

ShaymoOona يقول...

الحمد لله على السلامه و تقبل الله طاعتج

هديــل يقول...

الحمدلله ع السلامة
وان شاء الله استانستوا

Question mark يقول...

الحمدللة على سلامتج ونورتي ديرتج وناطرين يديدج

خدمات البحث العلمي يقول...

الحمدلله على السلامه وعيدك مبارك مقدما

mazyona يقول...

هلا شيمونة
نورتي
مشكورة

mazyona يقول...

هلا اقصوصة
علينا وعليكم
مشكورة

mazyona يقول...

هلا هديل
الحمدالله كان وناسه
مشكورة على المرور الحلو

mazyona يقول...

هلا نجري
منورة بوجودك
شكرا على المرور

mazyona يقول...

هلا مبدعة
علينا وعليج
منورة حبيبتي

Maram يقول...

الحمدلله على السلامة :)

Unknown يقول...

ييتي دبي أربع أيام ورحتي مثل الحلم يأختي بس أهم شيء أنا استأنسنا معاكم

والصياعه برمضان غير بعد هههههههه يالله المره اليايه ان شاء الله تقعدون شهر علشان نصيع عدددددددل

ألف الحمد الله علي السلامه يا الغاليه

صفحات مُلطخّة بحروفي يقول...

صح لسانج ..
شهر رمضان شهر التعبد وقراءة القرآن ، ونضيف عليهم شهر الأكلْ ..
من أول ما يأذن واحنا نآكل لي الامساك ..
الحلج ما يتصكر =q
-
تقبّلي مروري ^_^