الاثنين، 26 يوليو 2010

اسلوب الحوار



دايما اشوف في بعض المسلسلات والافلام ان هناك اسلوب للحوار يعني يوم البطله والبطل يبون يتهاوشون او يتناقشون في اسلوب حوار كل واحد يقول اللي يبي بطريقه حضاريه وكل واحد يقنع الثاني .
لكن بالحياة الواقعيه هل صج هناك اسلوب حوار بين الزوجين او الاخوين او الام وبنتها او الاب وابنه . 
لاحظت ان مجتمعنا مع ان الأكثر متعلم ومثقف يفتقد لأسلوب الحوار اللي هي من أهم مظاهر التطور والثقافه واللي وصى عليها الرسول صلى الله عليه وسلم . 
حيث ان في المجتمع الشرقي الرجل لايحب ان زوجته ترفع صوتها وتناقشه في كل المسائل وإذا حاولت فهو دائما يسعى لتجريحها او اقفال الموضوع او تطنيشها او تقليل من أهميتها 
كذلك الام والاب والابناء هناك حلقه حوار مفقوده بينهم . 
حيث نرى من النادر ان البنت تفتح قلبها لأمها أو أبوها وتناقش خياراتها أو تجدها خائفه من طرح مواضيع معينه . 



أنا أستغرب من هالأسلوب الذي من المفروض ان اندثر حيث ان اغلب الناس أصبحوا مثقفين ومنفتحين على الثقافات المختلفه لكن حين يصل الموضوع لأسلوب حوار ينقلب هذا الثقافه والانفتاح إلى تصكيره مخ غير طبيعيه . 
يعني لو أن كل زوج وزوجه اتبعوا اسلوب حوار حضاري بحيث كل منهم يناقش مشكلاته بطريقه حضاريه واسلوب متفهم فأتوقع ان لن تنتج مشكلات كثيره في بيتهم العائلي الصغير حيث سيتعلم الأبناء من والديهم طريقه النقاش والحوار مما سيدفع مجتمعنا الى التقدم والرقي . 
لكن للأسف فالرجل الشرقي يحب ان يفرض السيطره واتخاذ القرارات لبيته دون لجوء للحوار والمناقشه مع زوجه وأبناء ويظن أن بهذه الطريقه تكون الرجوله . 
لكن نصيحتي لكم يجب أن تتعودوا طرح اسلوب نقاش حضاري في كل بيت حيث ان مصلحه الابناء فوق كل شيء . 
أحزني مثل سمعته من قريب يقول ( ناقشوهم وخالفوهم ) طبعا يتكلم عن المرأه . 
أحب ان أقول ما هذا التطرف والعنصريه ان المرأه الآن وصلت لمراحل تعليمية متقدمه و لمناصب كبيره وليست مجرد آله لإحضار الابناء بل هي نصف المجتمع وهي التي تربي النصف الآخر . 
وأنا أرى أن عندما يناقش رجل زوجته بمشاكله ويأخذ رأيها قد تعطيه الحل أو قد تشير عليه بطريقه لتريحه فهي ليست مخلوق غبي انما لها عقل وفكر مستقل وهذا لن يؤثر على رجولته بل سيزيد احترامه وتقديره من زوجته وعائلته . 
نصيحتي للمقبلات على الزواج عودي زوجك على محاورتك ومناقشتك بكل شيء بالبيت بالابناء بكل شيء فهي حياتك أيضا وأسرتك فانتي عامود البيت .

هناك 17 تعليقًا:

شاي الضحى يقول...

في ناس الحوار عندهم بالصراخ والهواش

واي واحد فيهم اذا ما كان فاهم يعلي صوته عشان يسكت الي جدامه

شكرا على الموضوع :)

mazyona يقول...

هلا شاي الضحى
كلامج صح وهذا الاسلوب اللي أدى إلى المشاكل الزوجيه وازدياد حالات الطلاق في الكويت
تسلمين يسعدني مرورك

ZeeZoo يقول...

انا معاج بهالكلام
ياريت تعلقين على بعض البنات المبلتعات ماعندهم اسلوب وكل نصيحه يعتبرونها اهانه شخصيه بصراحه للأسف دكتورات واسلوبهم بهالشكل والله عيب ما ادري شلون راح يتعاملون مع المرضى بالمستقبل. طبعا انا اقصد فئه معينه مو الكل

مبدعه يقول...

عجبني جدا طريقة طرحك للمشكله وملاحظتها للاسف في مجتمعاتنا

لكن عندي تعليق على اخر نقطه

شلون اعود زوجي على الحوار <<ترى مو متزوجه

cho cho يقول...

والله كلام كبير يا أختي علي العين والرأس

بس وين اللي يفهم هالكلام ويستوعب.

بعض الرئاييل الله يسامحهم علي بالهم المراه

خدامه تحت أيده مو زوجه بس هو كلامه اللي يمشي

أما الزوحه ألمسكينه تضحي وتذبح عمرها أخير شيء

مايبين في عينهم وماتنسمع لها كلمه حتي النقاش

أقل حقوقها الزوجيه مائحصل إلا ناااااادر للأسف


شكرا لطرحج للموضوع وأتمني من الرجل يقراه هالكلام ويستوعبه

mazyona يقول...

هلا زيزو
كلامك صح في حريم جذي وفي رياييل جذي
تسلم على المرور

mazyona يقول...

هلا مبدعه
كل شيء يبدأ عند الملجه تقعدين معاه وتحطون النقط على الحروف وتتفاهمون ان طريقه حواركم بتكون بالشكل هذا
ويمكن تلاقين منه تقصير بس تقدرين جم مره بالصبر وبالطريقة الحلوه والاسلوب اللبق تفهمينه ان هالطريقة مو اسلوب حضاري
تخلينه يحترم فكرج ووجهه نظرج

mazyona يقول...

هلا جوجو
اي والله تلقينه بره وجدام الناس وربعه عنده اسلوب روعه
بس مع زوجته يعاملها كأنها الخدامه
مشكوره على المرور الحلو

alB6h يقول...

مساء الخير
امممم عندي راي ما ادري اذا توافقينه او لا !
بالاغلب اشوف المتعلمين اكثر اسلوب وتحضر وتفهم من غير المتعلم ومو شرط المتعلم اللي شهادته عالية لا يعني اللي عنده اطلاع ذاتي ومشتهد على نفسه يتعلم راح تشوفين اسلوبه بالنقاش مختلف مع غير متعلم , وساعات العكس اللي مو متعلم اسلوبه بالنقاش افضل من المتعلم ويمكن اهني يدش الخبرة وتربية , يعني امي مو متعلمه بس اسلوبها وطريقة كلامها وايد راقي احسها اكتسبت هالشي من الخبرة !!

يعني اسلوب النقاش والحوار يكتسبه الانسان من بيئته من المجتمع اللي يعيشه من الناس اللي يخالطهم وحتي من مدرسة او الكليه او اي مؤسسة تعليمية يعني العملية مركبة شوي ..

وفي نقطة احس الانسان مهم يكون عنده اسلوب وواصل لاعلى درجة من الرقي ساعات بلحظة عصبية او ضغط او نرفزة ما يقدر يسيطر ع نفسه !!

يعطيج العافية ع الموضوع الجميل :)

mazyona يقول...

هلا بطبوط
كلامج صح المجتمع والبيئه يأثر على الواحد أنا يدي تعليمه قليل بس اسلوبه ولا أروع .
وصح مرات بلحظة نرفزة وعصبية بس الواحد لازم يدارك نفسه انا اتكلم عن اللي كلش ما عندهم اسلوب بكل الاوقات ويعاملون حريمهم مثل أثاث البيت وموكل الرياييل والحريم جذي البعض بس التفاحه الفاسده تطغي على التفاح الزين .
تسلمين على الرد

maram يقول...

صاجه ماله دخل بالتعليم تلاقينهم معاهم احسن الشهادات و أسلوب مافي, ولا يحترمون غيرهم ...الاساس هي التربيه مو الشهادات .


يعطيج العافيه

mazyona يقول...

هلا مرام
يسعدني تواجدج
صح لازم دورنا نربي أبنائنا على الحوار والمعامله الطيبه

iCoNzZz يقول...

لا زال الأسلوب المتحجر يحكم الكثير من العرب , واقتناعهم بأن الأساليب القديمة صالحة لهذا الزمان ..
سابقاً كان الأب يقرر عن أبناءه وهو مصيب وكان الزوج يقرر مع زوجته بحكمه ..
الزمان اختلف وأصحابنا لا يزالون على علاقة الماضي ..

mazyona يقول...

هلا iCoNzZz
كلام صحيح وحلو
تسلم

طموحة مملوحة يقول...

المرة الياية عزموني رجاء

غير معرف يقول...

Bonito mensaje fuerte. Nunca pensé que era tan fácil. respetos a usted!

غير معرف يقول...

Muy buen puesto. Me tropecé con su blog y quería decir que he disfrutado mucho navegando por tu blog. En cualquier caso, voy a ser la suscripción a tu feed, y espero que escribir de nuevo pronto!