عصابه بنات ....

توني أسترجع أيام المراهقه كنت أنا وأختي وبنت خالي شله مجنونه محد يقدر علينا كنا عصابه بنات  .

كنا نحب نستكشف ونجرب مع بعض وكل أسرارنا مع بعض وكان عندنا مغامرات عجيبه وسوالف تضحك .

في يوم كنا سهرانين كالعاده لين الصبح جان أسأل سؤال شنو الشيء اللي تتمنين دايما ان شريك حياتج في المستقبل راح يسويه ويكون حده مجنون يعني بخيالج شيء كبير ؟ ( طبعا مراهقات كنا . ونحب سوالف الاشياء المستحيله ) 

المهم كل وحده فينا كان عندها اجابه عجيبه وتوني قاعده استرجع الذكريات الحلوه قلت لازم تعرفون خيالنا الحلو وين ودانا .

أنا كان حلمي وأمنيتي أن شريك حياتي يعطيني كف ( طراق ) ليش ما أدري ؟ يمكن لأنه بعمري محد مد ايده علي او لأني معقده أو لأني مجنونه على قولت زوجي بس كانت هالنقطه بالنسبه لي شيء مثير ما أدري شكلي مندمجه بالأفلام واااايد والقصص الرومانسيه . 

أما بنت خالي العزيزه فكان امنيتها أغرب مني هي مشاءالله عليها شعرها طويل فكانت أمنيتها أنه فارس أحلامها يشد شعرها نفس رجل الكهف تذكرون الميكي اللي رجل الكهف يشد شعر حبيبته ويدخلها بالكهف . أدري حالتها أخطر مني بواااايد شكلنا وايد مندمجين بالمصارعه و العنف توني أحس ان كانت أفكارنا عنيفه جدا صج مراهقين أشوه زوجها ما طبق النظريه . 

أما أختي الفتوه بينا من احنا صغار لين كبرنا هي محد يقدر يسويلها شيء مسويه رعب عند البنات والشباب لأنها كانت تطق طق ما ترحم أحد فكان أمنيتها أن أحد يدوس في بطنها بس طبعا كان كلامها مجازي أتوقع ان كان قصدها أن أحد يقدر يوقفها عند حدها أو يقدر يسيطر عليها ما أدري خبال المراهقه وزوجها الحمدالله قادر يسيطر عليها بس مسكين ما أتوقع ان يدري انها تبي أحد يدوس في بطنها جان تعقد عادي . 

أما زوجي العزيز يوم كنت أقوله السالفه وأنا أضحك على سوالفنا و مراهقتنا جان يضحك ويقولي أفا عليج عرفت شنو أعطيج هديه المره اليايه أقعدج بطراق وأنومج بطراق هذا كل امنيتج . أدري ان مستحيل يسويها بس حاب يتغشمر معاي ويضحك على جنون مراهقتي ما أدري ليش العنف كان عندي شيء مثير مع أني أحتقر أي ريال يطق زوجته أو يهينها بالكلام بس يمكن من تأثير الأفلام الهنديه . 

أدري سوالفنا كانت عجيبه خاصه شلتنا . 

ومن سوالف ومغامرات عصابتنا 

أذكر مره كنا بدبي أنا وأختي وبنت خالي وفجأه قررنا أن ننحاش من البيت ( أدري ميانين ) بس نحب نجرب كل شيء المهم أتفقنا أن نطلع من العصر وجهزنا الماي والأكل وعدتنا كلها وبعدين فكرنا أي طريق راح نمشي فاقترحت بنت خالي أن نرسم مثل خريطه نمشي عليها ونشوف وين توصلنا . 

المهم رسمنا الخريطه ومشينا عليها طبعا كان حر ومشينا مشي ولفينا ودرنا وصار المغرب وظلمه قررنا ان نرتاح شفنا سور قلنا خلنا نقعد يمه ونآكل ونشرب عنده المهم واحنا قاعدين ومستانسين جان يشوفنا ولد خالي جان يسألنا شنو تسوون هني انتوا ما تخافون. بعدين سألناه وكل وحده تطلع انها بطله ليش نخاف يعني؟  جان يقولنا قاعدين يم المقبره المغرب ومو خايفيين المهم احنا سمعنا جذي قعدنا نصرخ وقطينا كل اللي معانا وانحشنا ركض لين البيت للحين أتذكر اللحظه اللي اكتشفنا فيها أن قاعدين عند مقبره صج ميانين بس زين علشان نحرم مره ثانيه ننحاش خوش درس تعلمناه . 

صج ذكريات و أحداث محد يخطر على باله كنا شياطيين من احنا صغار ومحد كان قادر علينا بس الحمدالله عقلنا يوم كبرنا يعني الحين  (أتمنى هالشيء ) أصلا لو تسمعون مغامراتنا وسوالفنا راح تستغربون صج كنا شله ينخاف منها الله ستر ان كل وحده تزوجت وطخينا شوي بس مرات أشتاق حق سوالفنا ومجنونياتنا . 

تحياتي لشلتي الجميله عصابه البنات  . . .