الثلاثاء، 20 يوليو، 2010

لا تنسى مره ثانيه



هلا شخباركم
انا طبعي احب احتفل بكل مناسبه تمر علي
احتفل بعيد ملجتي وعيد زواجي وكل الاعياد احب المناسبات بكل أنواعها وريلي عمره ما نسى هالشيء .
المهم ان هالسنه او هالشهر بتحديد هو عيد ملجتي يعني المفروض ان ريلي ذاكر مع انه بعيد بكندا وأنا بالكويت
و ان على الأقل يطرش لي رساله او اميل او حتى تليفون علشان يحسسني انه ذاكرني او ذاكر أهم يوم بحياتي .
لكن للأسف مع مشاغله و دراسته نسى أهم يوم عندي
عاد انا كنت معصبه عليه وايد يعني تدرون الحريم يذكرون هالسوالف ومستحيل ينسون .
المهم بعد ماطرشت له اميل وذكرته باللي ناسيه و سويتله فيلم هندي الأخ  داق يعتذر ( طبعا لازم أحسسه بذنب )
و قلتله ان من كثر ما كنت زعلانه منه حلمت بشاروخان يقولي كلام حلو ويرقص معاي وسوينا فيلم هندي .
المهم ريلي عصب وطلع فرمان ومنعني من أن أطالع الأفلام الهنديه خاصه أفلام شاروخان .
يقول ريلي ان الافلام الهنديه مخربه مخي بس شنو اسوي إذا انا انسانه رومانسية واحب الرومانسيات بكل أشكالها 
المهم حبيت أحط البلوق علشان أذكر الرياييل أن الحريم ما ينسون خاصه المناسبات الحلوه دير بالكم تنسون  وإلا ...
وأما بنسبه لزوجي العزيز بقوله ما راح أبطل أفلام هنديه ورومانسيات   .
ولو سمحت لاتنسى مره ثانيه عيد ملجتنا وإلا راح تروح تنام عند أمك . 


هناك 14 تعليقًا:

هديــل يقول...

هههههههههههههههه حريم :q

كل عيد ملجة وانتي بخير :>

جاكليته يقول...

فعلا الحريم يهتمون باشياء كثيره ويتذكرونها في مقابل نشوف الريايل ما يهتمون في انهم يتذكرونها ..يمكن تكون في بالهم بس ماهي مهمه حييل .

ورسالتج في محلها ..

والله يوفقج مع ريلج ويسعدكم .. وكل عيد ملجة يتذكرج يا رب ..

شاي الضحى يقول...

الله يوفقكم

وان شاءالله ما ينسى مره ثانيه

كل عيد ملجه وانتي بخير ههههه :)

فـ(المطيري)ـدكـ يقول...

كـل عام وانتي بألف خير ..

ههههههه من بعد شاروخان ما اظن ينسى مرة ثانية خخخخ ..

mazyona يقول...

هلا هديل
وانتي بصحه وسلامه
تسلمين على المرور

mazyona يقول...

هلا جاكليته
شفتي يعني أنا أكتب علشان أنصح الرياييل مو علشان احط على ريلي ( بريئه صح )

mazyona يقول...

هلا شاي الضحى
لا المره اليايه بينام عند أمه اذا نسى
يعني بطرده من البيت
وانتي بخير تسلمين

mazyona يقول...

هلا فـ(المطيري)ـدكـ
اي خلاص تحطم من بعد شاروخان
عيل شلون نحسسهم بذنب
تسلمين

cho cho يقول...

هههههههههههههههههههه

الله يعينك يا إبراهيم هذي حنو واعرفها

عيد أول ورده وأول نظره وأول همسة

ياحليلها تحب تحتفل بكل لحظه يالله ماعليه خيرها

بغيرها المره اليائه إذا نسيت بتحلم بسلمان خان


هههههههه

كل عام وأنتي بخير وعقبال مليوم عام علي ملجتكم

DoDoq8 يقول...

لوول الرياييل عيد ميلاد ويالله يتذكورنه

تبين عيد ملجه وعيد زواج

mazyona يقول...

هلا جوجو
مشكوره صج تعرفيني
بعد مو كافي اني مستحمله انه بعيد
يعني لازم يذكر كل شيء وإلا ...

mazyona يقول...

هلا DoDoq8
يعني ليش ما يذكرون أهم يوم بحياتهم يوم تزوجوا أجمل شريكه وحصلوا نصهم الثاني
المفروض إذا الحريم نسوا الرياييل ما ينسون .
شكرا على المرور الحلو

she is me يقول...

بس هالمره نسى .. سامحيه .. طول عمره يتذكر .. ^^
وماراح ينسى مرة ثانية .. لأنه بيطلعله شاروخان بالحلم

mazyona يقول...

هلا شي از مي
اي مسامحته بس لازم القرصه علشان ما يعيدها
تسلمين