مو فاضيه تدرون ليش ؟

هلا شخباركم من زمان ما شفتكم ولهت عليكم أدري اشتقتولي وايد ( ثقة عمياء ) المهم هاليومين كنت كلش مو فاضية السبب

ان مشاء الله كل الناس بتتزوج شهر ٧ قبل رمضان وأنا وحده مليت من العروس والمناسبات كل يوم اما عرس أو حفله تخرج

أبي اقعد بدون ما أفكر شنو راح ألبس ولا أي صالون بروح ولا شنو أعطيها هديه احس خلاص فلست بسببهم وكرهوني بالعروس و الحفلات وهناك بعد اسباب ثانية .

تفكيري مشوش علشان جذي ما فضيت علشان احط بوست اصلا ما فضيت أحك رأسي وغير جذي عندي عماتي يايين من دبي زياره فلازم أجابلهم يعني عيب اكشت فيهم . 

قلت اليوم لازم أحط بوست علشان نفسيتي ترتاح وأفضفض أحب أفضفض بالمدونه أحس هي ملجأي وملاذي يعني ما أحب أخلي بخاطري شيء يعني احنا الحريم لازم نقول اللي بقلبنا ولا ننفجر  يعني انا وحده حاولت أسوي نفس قصه حلاق السلطان تذكرونه  اللي ما يذكر هذي القصه . 

 ( تتذكرون معي قصة حلاّق الملك الذي كان الوحيد الذي يعرف بحقيقة أذني الملك بحكم مهنته(وكان للمك أذنان كأذني الحمار). وخاف أن يقتله الملك إن تكلّم، وضاق بما يعرف. إنّه لا يستطيع احتباسه في صدره.. فمعرفته لا تعني شيئاً إن لم تصل للناس، لكنّه يخاف القتل. وبدأ بطنه ينتفخ من هذا السر فنصحوه بحفر حفرة عميقة وفض كل كلامه فيها . فلجأ إلى شاطئ النهر، وأخذ يحفركل يوم حفرة في رمال الشاطئ يقول فيها: “للملك أذنان كأذنيّ الحمار” ثم يردمها. ومرّت الأيّام فنبت القصب من هذه الحفر. وصار القصب، كلّما مرّت فيه الريح، يصيح “للملك أذنان كأذنيّ الحمار؟؟ )

 يعني افضفض بمكان بحفره ولاشيء بس ما نفع معاي هالطريقه ولقيت البلوق احسن حل ومكان لخرابيطي وفضفضتي وراحه بالي   . 

سؤال  ليش الرياييل مو نفسنا اللي في قلبهم يقولونه ويفضفضون يعني لازم الوحده فينا تسوي تحقيق 

وسين وجيم بس علشان تعرف شنو في زوجها . انزين هذي زوجتك ليش ما تقول اللي بقلبك وخلاص ولا غاويين تعب وقلق . أحيانا لما الواحد يفضفض يرتاح كافي ان زوجته بتخفف عنه والسبب الأهم ان علميا لقوا اللي يفضفض يعيش أكثر من الانسان اللي يكتم بقلبه ؟

وأخيرا وليس أخيرا أشتقت لكم وإذا شفتوني طولت المره اليايه عرفوا اني اما ذبحت احد بالعرس أو اني انتحرت بسبتهم   

( يعني ما تعرفون تحطون سبعين عذر ) 

وسلامتكم