ما بعد العداوه إلا .....

أنا ماعندي إلا اخت وحده و3 صبيان الله يخليهم كلهم ويحفظهم من كل شر . 

اليوم بكلمكم عن أختي هي أصغر مني بسنه بس ما كان في فرق بينا كنا عايشين بغرفه وحده ومع بعض.

أنا وهي كنا مثل الزيت والماي ما نندمج وكله نتهاوش على كل شيء.

كنا تناقض و كل وحده تحاول تفرض سيطرتها وشخصيتها وتبين انها boss أو الرئيسه.

طبعا أختي كنت اسميها big mouth لأنها إذا ما عجبها شيء راحت واشتكت عند أمي .

أختي كان فيها عقده الترتيب وايد زياده عن اللزوم يعني يوم تنظف الغرفه كانت تبيها نظيفه ومرتبه لين الاسبوع الياي واذا لقت لو شباصه بغير مكانها قامت الهوشه .

أما أنا كنت أعاندها و اخرب بس غرفتي وكيفي أو يمكن لعانه لأني كنت مراهقه أحب أحد ينطف عني ويرتب لي مدلعه على الاخر ( عبالي الأميره حنون عايشه الدور ) .

كنت ما أحب يوم أحد يجبرني على شيء خاصه هي علشان ما تتشمت فيني بعدين .

كنا حتى التلفزيون نتهاوش عليه لأنه اللي يفتح التلفزيون الأول يتحكم بالبرامج طول اليوم واحنا كنا نعاند بعض

حتى  بتقسيمه الشغل تعطيني الأشياء الصعبه كنت أحس اني محكوم علي بسجن مع الأعمال الشاقه كانت دائما تسوي فيني حركه نذاله كانت تفتح كبتي وتقط كل ملابسي على الأرض وتقولي رتبيهم كنت انقهر من الحركه هذي .

كانت هي الأنسه منشن وأنا سالي (بريئة أدري ) ومرات كانت تسويني سندريلا .

بس أنا بعد ما كنت هينه كنت انتقم منها بشتى الطرق كنت أدري انها خوافه كنت دوم كل يوم بليل قبل ما تنام أقولها قصص رعب و أشياء تخرع كنت كل يوم اطلع لها بقصه تخرع علشان ما تنام .

واذكر مره هي كانت نائمه قمت وحطيت لها صرصور بلاستيك على السرير عاد مسكينه هي صراخ وأنا ضحك .

تدرون العين بالعين والبادي اظلم . ما أدري ليش الكل شايفينها بريئة وأنا شريره مع اني شايفه العكس .

كنا الاخوه الأعداء ومرات نصير توم وجيري ( أكيد أنا جيري ) .

بس هذا ما يمنع ان كنا نحب بعض بطريقتنا الخاصه وان كل أسرارنا مع بعض وفي أوقات وايد نتفق بس وقتها كنا مو حاسين بالشيء هذا كنا نتمنى نفتك من بعض . 

صج إلواحد ما يحس بشئ لين يفقده يوم تزوجت حسيت اني فقدتها وايد واني أحبها وافتقدت أيامنا مع بعض وايد تغيرت العلاقه بينا يمكن لأنه نضجنا وكبرنا بس للأسف هي بعد تزوجت اماراتي وسافرت وياه هناك وصرنا ما نشوف بعض إلا بالاشهر أو العطل ( يعني بالحسره ) .

الحين أنا وهي حسينا بقيمه كلمه الاخت وصرنا نحب بعض ونموت على بعض ونتذكر قبل وسوالفنا ونضحك يعني خلاص عقدتنا ان كنا نبي نذبح بعض خلصت وحل محلها علاقه كلها حب وحنان و اخوه.

صج مابعد العداوه إلا محبه

( أكيد أختي اليوم راح تقراه البلوق وتضحك ودها تعلق )

تحياتي إلى أختي الحبيبه أحبج .