السبت، 3 يوليو 2010

ما بعد العداوه إلا .....



أنا ماعندي إلا اخت وحده و3 صبيان الله يخليهم كلهم ويحفظهم من كل شر . 
اليوم بكلمكم عن أختي هي أصغر مني بسنه بس ما كان في فرق بينا كنا عايشين بغرفه وحده ومع بعض.
أنا وهي كنا مثل الزيت والماي ما نندمج وكله نتهاوش على كل شيء.
كنا تناقض و كل وحده تحاول تفرض سيطرتها وشخصيتها وتبين انها boss أو الرئيسه.
طبعا أختي كنت اسميها big mouth لأنها إذا ما عجبها شيء راحت واشتكت عند أمي .
أختي كان فيها عقده الترتيب وايد زياده عن اللزوم يعني يوم تنظف الغرفه كانت تبيها نظيفه ومرتبه لين الاسبوع الياي واذا لقت لو شباصه بغير مكانها قامت الهوشه .
أما أنا كنت أعاندها و اخرب بس غرفتي وكيفي أو يمكن لعانه لأني كنت مراهقه أحب أحد ينطف عني ويرتب لي مدلعه على الاخر ( عبالي الأميره حنون عايشه الدور ) .
كنت ما أحب يوم أحد يجبرني على شيء خاصه هي علشان ما تتشمت فيني بعدين .
كنا حتى التلفزيون نتهاوش عليه لأنه اللي يفتح التلفزيون الأول يتحكم بالبرامج طول اليوم واحنا كنا نعاند بعض
حتى  بتقسيمه الشغل تعطيني الأشياء الصعبه كنت أحس اني محكوم علي بسجن مع الأعمال الشاقه كانت دائما تسوي فيني حركه نذاله كانت تفتح كبتي وتقط كل ملابسي على الأرض وتقولي رتبيهم كنت انقهر من الحركه هذي .
كانت هي الأنسه منشن وأنا سالي (بريئة أدري ) ومرات كانت تسويني سندريلا .
بس أنا بعد ما كنت هينه كنت انتقم منها بشتى الطرق كنت أدري انها خوافه كنت دوم كل يوم بليل قبل ما تنام أقولها قصص رعب و أشياء تخرع كنت كل يوم اطلع لها بقصه تخرع علشان ما تنام .
واذكر مره هي كانت نائمه قمت وحطيت لها صرصور بلاستيك على السرير عاد مسكينه هي صراخ وأنا ضحك .
تدرون العين بالعين والبادي اظلم . ما أدري ليش الكل شايفينها بريئة وأنا شريره مع اني شايفه العكس .
كنا الاخوه الأعداء ومرات نصير توم وجيري ( أكيد أنا جيري ) .
بس هذا ما يمنع ان كنا نحب بعض بطريقتنا الخاصه وان كل أسرارنا مع بعض وفي أوقات وايد نتفق بس وقتها كنا مو حاسين بالشيء هذا كنا نتمنى نفتك من بعض . 
صج إلواحد ما يحس بشئ لين يفقده يوم تزوجت حسيت اني فقدتها وايد واني أحبها وافتقدت أيامنا مع بعض وايد تغيرت العلاقه بينا يمكن لأنه نضجنا وكبرنا بس للأسف هي بعد تزوجت اماراتي وسافرت وياه هناك وصرنا ما نشوف بعض إلا بالاشهر أو العطل ( يعني بالحسره ) .
الحين أنا وهي حسينا بقيمه كلمه الاخت وصرنا نحب بعض ونموت على بعض ونتذكر قبل وسوالفنا ونضحك يعني خلاص عقدتنا ان كنا نبي نذبح بعض خلصت وحل محلها علاقه كلها حب وحنان و اخوه.
صج مابعد العداوه إلا محبه
( أكيد أختي اليوم راح تقراه البلوق وتضحك ودها تعلق )
تحياتي إلى أختي الحبيبه أحبج .

هناك 23 تعليقًا:

شاي الضحى يقول...

لوووول كنتوا عايشين بحرب

الله يخليكم حق بعض

:)

رورو الشخبوطه يقول...

الله يخليكم لبعض يارب..

الخوات اهم اعز الصديقات :)

mazyona يقول...

هلا شاي الضحى
اي والله حرب بس انتهت بسلامه الطرفين ورفع الرايه البيضاء

mazyona يقول...

هلا رورو
اي والله اعز صديقات مشكوره على المرور الحلو

Hadeel يقول...

الله يخليكم لبعض ان شاء الله

أنا واختي (توأمي) جذي كنا أول .. يوم كنا بغرفه وحده .. اهي نقيضي بكل شي .. تتسلط علي وأنا أتعمد أسوي الي يقثها عشان تعصب وإذا قالتلي رتبي أو سوي .. أحقرهااا
اهني عاد تستخف

و محد يدخل بينا لان الي يدخل يضر عمره .. بعد ثانية ردينا عااادي واهو الي اقتث ووحدة فينا زعلانة عليه بعد
فكانو ومازالو يخلونا نتهاوش ونتراضى بروحنا
بس الحين اهيه بغرفتها وانا بغرفتي وبينا باب لمن نتهاوش نقفله ولمن نتراضى انبطله وعلى هالحال
واذا تزاعلنا أقوم اشغل محاظرة ولا نشيدة وأعلي صوته حييل .. عشان أنتقم لنفسي.. واهي تسوي نفس الشي بعد.. اتيي امي وتزفنا ثنتيناتنا



المتزوجة دايما تحتاج خواتها أكثر من قبل ما تتزوج<< هذي قناعتي^^
لان وعليه عليها تكثر همومها ومشاكلها^^

صارلي فترة ما أقدر أعلق ببلوقج .. المؤشر ما يطلع .. ما أدري ليش..عاد اليوم قلت خل نجرب .. وفعلا عادت المياه لمجاريها
^^

هديــل يقول...

دايما جذي كل الخوات حتى انا وخواتي

بس بالنهاية مالنا غنى عن بعض :)

الله يخليلكم لبعض

Unique Girl يقول...

أمبييييييييييييييه ذكرتيني بأختي

واي صح دااايم يحسبوني انا الشريره واهي البريئه تدرين ليش لأنها إذا شافت أمي ولا أبوي تسكت بس إذا كنا روحنا يطلع السانها

اما انا مايهمني لوووول

الله يعينا على الدنيا بس انا اختي ليلحينها معاه فديتها يااارب يخليها لي

أحبـــــــــــــــــــــج نونو

مشكوووره على الموضوع الحلو الي صج ينن ويارب يخليلنا خواتنا

تقبلي مروري

Unknown يقول...

آنسه منشن سويتيني هاه يا سالي

ماعليه ياحنو دواج عندي ان مارديت لسوالف قبل وخليتج تنظفين البيت مأكون cho cho

بس تعالي مني يا سندريلة زمانج حاطه لي الصرصور وأنا طول هالمده علي بالي
صجي ياااا المجررررررررررررررررررررررمه

بس جدجدجد هالموضوع ذكرني بذكريات حلوه
خاصة يوم آخذ ملابسج اللي ماتعجبني انقهر تلبسينه وأيد واقطه بالزباله خخخخخخخ

يالله ربنا يخليكي ليه يا أختي الحبيبه

Hope يقول...

مسا الخير

يحليلكم والله
بس ترى عادي كل الخوات جذي لازم هواش و نجره
الله يخليكم لبعض

mazyona يقول...

هلا she is me
وناسه سوالفكم جنه انا واختي
الله يخليج لها ويخليها لج
ويسعدني ردج وتواجدج بالمدونه

mazyona يقول...

هلا هديل
مشكوره
صج الواحد يحس بقيمه خواته عند الفرقا

mazyona يقول...

هلا Unique Girl
مشكوره على الرد الحلو
بس دايما سوالف الخوات لازم في وحده شريره وحده تنتقم .

mazyona يقول...

هلا أختي cho cho
يسعدني انج رديتي علي
اي ذكريات حلوه وما أنسى يوم تقطين ملابسي بالزباله وبعدين صج احس كنت سندريلا .
شفتي البراءه

mazyona يقول...

هلا هوب
اي والله كل الخوات جذي أشوه مو بس أنا اللي كانت اختي معقدتني في بنات يالله نسوي حمله .
مشكوره على الرد

basees@bloggspot.com يقول...

حطيتي يم أختك صرصور بلاستيك واصرخت؟؟
ماأستغرب، لو كان هالصروصور من ذهب هم ماينبغى.

كوكتيل يقول...

الله يخليكم لبعض أن شاء الله :)

الخوات هم حلاوة الحياة وبلسمها

لو شنو يسون اله يحفظكم لبعض :)

نبراس يقول...

=* اصلا ملح الاخوة النرفزة بينهم لوول^^

الله يخليكم ليعض
مافي شيء يعوض الاخت

mazyona يقول...

هلا بسيس
شكرا على المرور

mazyona يقول...

هلا كوكتيل
تسلمين مشكوره على المرور الحلو

mazyona يقول...

هلا نبراس
نورت المدونه شكرا على المرور

نبراس يقول...

يسلمج
:$ بس انا بنت :p
لوول ..


اعتذر على العودة
بس لتصحيح =)
يمكن لان راقتني مدونتج

mazyona يقول...

هلا نبراس
نورتي المدونه واعذريني على الخطأ الغير مقصود

غير معرف يقول...

Awesome blog! Do you have any suggestions for aspiring writers?

I'm planning to start my own site soon but I'm a little lost on everything.
Would you suggest starting with a free platform like Wordpress or go for a paid option?

There are so many choices out there that I'm completely overwhelmed .. Any ideas? Cheers!
Also visit my web blog :: GFI Norte