السبت، 26 يونيو، 2010

ملانه ؟



تدرون بدأت العطله وبدينا اجازة وبدا الملل يتسرب إلا نفسي 
ففكرت أبي أدخل دورات أشغل فيها نفسي وأستفيد منها 
بكندا كان الموضوع سهل كنت أدور بالنت وكل الدورات اللي أبيها ألاقيها طبعا جربت وايد دورات ما حطيت بخاطري شيء
المشكله أن بالكويت مهما أحاول أدور دورات غير تقليدية ما ألقى مع ان اسمع ان موجود بس شنو أفضل طريقة الواحد يدور فيها على دورات لجأت للجرايد ومامنها فايده ماكو شيء عن دورات للكبار كله لليهال وسوالف نوادي 
يعني بغيت دورة للنحت أو دورة عمل الخزف  أو دورة صنع اكسسوارات او ذهب او دورة صنع صابون او دورة صنع عطور او دورة كيف تكون قائد وايد في دورات أبي شيء غريب وحلو ممكن الواحد يستفيد منه وما يمل لأني بسرعة أمل .
في دورات وايد بس الأكثر تقليدي و أنا بغيت شيء غير تقليدي لو تدلوني تكونون سويتوا لي خدمه  .
 مع وقت الفراغ الزايد عن حده لازم الكل يشرك عياله دورات و نوادي طبعا إذا كانوا مو ناويين على سفره .
لانه أكثر الناس مخططين على سفره فهذا بروحه يشغل الوقت . لكن اللي مو مسافرين هم اللي يحسون بوقت فراغ . 
علشان جذي يالله معاي بحمله اشغل وقت فراغك بشيء مفيد . 



هناك 8 تعليقات:

ghdhayat يقول...

مركز خدمة المجتمع بجامعة الكويت يقدم دورات وايد وحلوة وهم مو تقليدية .. اذا ما كنت غلطانة في عندهم دورات خزف وكروشيه و لغات وسوالف ثانية حلوة .. جنه تسجيلهم يسكر ٧/٥ فلحقي عليهم ..

مبدعه يقول...

انتي مثلي تملين بسرعه

واكره شيء عندي بالحياة هو الفراغ

هالفتره داخله دوره في تصفيف الشعر مدتها شهر اللحين انا في الاسبوع الثالث فيها واحس ودي بقوه اغيب ولا عاد اجي

رغم انها ممتعه والبنات حلوين اللي معاي بس خلاص ابغى اغير روتيني لي 3 اسابيع على نفس المنوال

انتي دوري عن اسماء المراكز اللي تقدم دورات واذا دخلتي موقعهم اكيييد بتلقين عارضين فيها كل دوراتهم وان شاء الله تلقين اللي تبين عندهم

طيب شرايك في دورة رقص شرقي او الكاراتيه
مررره ودي بهالثنتين بس مو لاقيه وقت

mazyona يقول...

هلا ghdhayat
نورت المدونه سمعت بدورات الجامعة بس محد يمدحها لي يقولون عادية بس بشوف الدورات الغريبة .
تسلمين

mazyona يقول...

هلا مبدعه
حلو دورة تصفيف شعر بس المشكله اذا خذيتيها وحسيتي ان الشغله هذي مو من هواياتج
اما عن دورة الرقص فخذيت بكندا دورة سالسا وتانغو و تشاشا وكانت عجية وحلوه حبيتها لو في دورات مثلها اوكي راضية اما رقص شرقي ما جربت بس حلو التجربة ليش لا .

شاي الضحى يقول...

قبل فتره سمعت عن دورة كيف تكونين قياديه/قائد تقدمهم "بثينة الابراهيم" اذا ما غلطت بالاسم

وقالوا ان خلال هالفتره بس مادري متى بالضبط

والي اعرفه ان عندها ويب سايت وفيس بوك

سويي سيرج وشوفي

:)

mazyona يقول...

هلا شاي الضحى حلوه اسم الدوره
مشكوره وايد على المعلومة

Engineer A يقول...

عليج بالعافية المشتروات ..

بالنسبة للملل وضيقة الخلق .. حاول تشتركين بنوادي أو دورات مثل ما اقترحوا عليج المدونين وان شاءالله تشغلين نفسج بشي مفيد وحلو يضيع وقتج ويعود عليج بالاستفادة :)

mazyona يقول...

هلا Engineer A
هذا المطلوب بس ين في دورات حلوه ؟؟؟؟؟