ذبحتني الغيره ؟

هلا شخباركم 

موضوعي اليوم موضوع حساس بالنسبة لي لأنه عن الغيره

أول ما تزوجت كنت أغار من لابتوب ريلي من كثر ما يقعد عليه كنت أحسه شريكتي ما خذ وقته كله ما كنت أحب اللابتوب كلش كنت أحس في لحظات ودي أمسك اللابتوب وأكسره خاصة وأنا أكلمه وهو الأخ مندمج بشغله على الكمبيوتر . 

المهم مرت الأيام ويبت ولدي ( الله يحفظه ) بس المشكله كنت أغار وايد من ولدي خاصة أن يوم زوجي يزورني كان يقعد يلعب مع ولده وكل السوالف عنه أدري ان المفروض ما أغار بس كنت أغير منه لدرجة ما أستحملت وقلت حق زوجي أن قاعد يهتم بولده أكثر مني طبعا رده عالطول في وحده تغار من عيالها . ما أدري بس ما حبيت الوضع وهو ما قصر قام يهتم فيني وبولده المهم هذا الولد وايد حسيته اتدلع من كل الجهات لأنه أول حفيد فقلت إلا أيب ياهل ثاني علشان يخرب عليه الجو . ( أدري بتقولون مجنونه ) بس الغيره ما أدري خلتني ما أعرف أفكر . المهم الله رزقني ببنت ( الله يحفظها ) بس أحس كل شيء انقلب ضدي .

المهم تدرون البنت تآخذ قلب ابوها مو الغيره وصلت حده إلا بتنفجر عندي .

بنتي مشاءالله عليها بس تسولف مع ابوها و حركات بابا أحبك وأموت فيك وتدرون حركات البنات والأخ معاها وكله مادحها وكلامها يمشي بنفجر والله حاله يعني بنتي ماخذه الجو كله . 

عاد مسكين زوجي يحاول يرضي الطرفين ما يزعل بنته ولا زوجته لازم إذا قال حق بنته أحبج لازم يلف ويقولي نفس الحجي يعني هذا حالته صج يكسر الخاطر البنت وأمها ميانين . 

المشكله أن بنتي تحب تخليني أغار تقعد تمسك ايد أبوها وتحضنه وتقول هذا ابوي وخري عنه و هو حقي وأنتي شنو تبين اللي أنا لحظتها ودي أذبحها بس أعصب وريلي يضحك علينا صايرين وحده وشريكتها مو أم وبنتها . 

ففكرت ما في إلا أني أييب بنت ثانية علشان لا تآخذ بنتي كل الأجواء بس الخوف ان الموضوع ينقلب ضدي ويصيرون عصابه علي لأنه أول مره الموضوع انقلب ضدي يعني أجازف ولا . 

يعني شنو الحل ؟؟؟؟؟؟ 

أدري أني مجنونة شوي بس المفروض عرفتوني من بلوقي وأسمه كيفي مجنونه وعلى فكره هذا ما يمنع ان أحب عيالي بس المشكله أني أغار وايد .