الأربعاء، 16 يونيو، 2010

أنا وأفلام الرعب



من أنا صغيره أموت على أفلام الرعب وما كنت أخاف 
كانوا يضربون فيني المثل  كنت أشجع البنات و أقوى من الشباب ( صرت سوبر ومن ) .
المهم كنت دايما أسوي مقالب بأخواني وأختي مسكينه دايما تبجي عند أمي لأنه أخرعها و أقولها قصص مرعبه . 
إلى ان تزوجت زوجي يمووووت على أفلام الرعب ( سعيده ياها سعيد ) يعني على مزاجي . بس المشكله يوم حملت بولدي الأول ريلي كل يوم يوديني السينما فيلم رعب وكل فيلم يخرع أكثر من الثاني ما أدري كان ناوي علي نيه ولا شكوا ومن كثر ما شفت أفلام رعب وأنا حامل تعقدت وصرت أخاف تدرون نفس ما قال نيوتن كل فعل له رد فعل عكسي ( تدرون مدرسه علوم ) وصار أكره شيء عندي أفلام الرعب وإذا دخلت معاه السينما حطيت ايدي على عيوني وغطيته وأقول حق ريلي قولي شنو صار تخرع اللقطة يرد علي : إذا مو ناويه تطالعين الفيلم ليش دافعة تذكره وقاعده ( لقافة بعيد الشر عنكم ) و احس تشمتوا فيني أخواني لأنهم صاروا عادي يحبون أفلام الرعب وما يخافون ( يعني مواقفي اللي سويتها منها فايدة قوت قلبهم ) وأنا مسكينه حتى بتلفزيون إذا شفت شيء يخرع ما أنام وأبطل اللمبات وأنوم عيالي يمي . صج ما سوت علي لقطة أشوفها حتى إذا طلعت لقطة بالغلط غمضت عيني وبسرعة غيرت القناة . 
هذا آخرتها من سوبر ومن إلى فار .

هناك 13 تعليقًا:

كوكتيل يقول...

مساء الخيرات :)

أنا عاد ما أقدر على أفلام الرعب لا وأنا صغيرة ولا وأنا كبيرة :)

وعلى قولتك إذا طلعت لقطة بالغلط وشفتها أقعد أفكر فيها وما أنام :(

مرة إختى قصت على قالت لي حجزت سينما مفاجأة الفيلم قلت لها لا يكون رعب أعرف سوالفك جان تقول لا وبعدين لما دشينا الفيلم وقبل ما يبدي أعترفت إنه رعب وصج ما نمت إسبوع :(

أنطر الشمس تطلع أطمئن أنها طلعت أنام لا والليت مبطل بعد :(

ما أحبهم كليييش :(

يعطيك العافية يسلمو :)

mazyona يقول...

هلا كوكتيل
عاد اختج اجرام جنها أنا ايام كنت رامبو اما الحين الله يعيني
تسلمين على الرد

كمبيوترجي يقول...

ههههههههههههه
كما تدين تدان و كما زرعت تحصد ...
في الأمس القريب كنتي ترعبي كل الأهل .
و استانستي على قولتج ( سعيدة و سعيد )
لكن سعيد الحين ياخذ اجر لانه يرد الرعب اللي سببتيه لاخوانك و اختج الله يحفظها

أسجل إعجابي بتدويناتك الكريمة
تقبلي وافر احترامي
كمبيوترجي

شاي الضحى يقول...

لووول ما تسوى عليج

مره ثانيه لا تروحين :)

Engineer A يقول...

هههههههه انتي جنج أنا !

بس انا شوي مختلفه عنج بطفولتي اكره افلام الرعب واخاف منها ، بمراهقتي اموت عليها واحب اروح اشوفها لين تزوجت قمت اخاف من اي شي مرعب!! :)

مادري يمكن الزواج خرعنا لوول الله كريم :)

mazyona يقول...

هلا كمبيوترجي
آه يا القهر من مدة كنت أنا اللي أخوف
وانقلب الحال وصاروا يخوفوني
مشكور على الكلام الحلو
وحياك الله بالمدونة

mazyona يقول...

هلا شاي الضحى
مو إذا ما رحت أنقهر هو يروح الفيلم بروحه
تسلمين

mazyona يقول...

هلا Engineer A
الظاهر هذي خطة الرياييل قالوا بدال مانذبح لهم القطة السوده نخرعهم بأفلام الرعب أسهل
تسلمين

خاتون يقول...

ههههههههههههه
ما سوت عليج هالأفلام عاد هالأيام مافي أفلام رعب صجية الرعب صار ذبح و بس
على قولتهم"اللي بنعملوا بالناس طلع علينا"
هههههههههههههههههههههههه
وناسة طلعتي مدرسة علوم يعني زميلتي تشرفنا

قوي قلبج يقولون الزنجبيل يقوي القلب و يقلل من الخوف جربي
موفقة عزيزتي ^_^

mazyona يقول...

هلا خاتون
اي والله كلامج صح
اي خلاص صرنا زملاء مهنه
انشاءالله بجرب الوصفه

ريم يقول...

هاذي اخرته انا بعد احب افلامالرعب

غير معرف يقول...

احبكمممممممممممم يبنات الكويتتت


للمراسله


az_a25_oz@hotmail.com

غير معرف يقول...

هههه الله يعينج اختي

عاآد انا عشقي الافلام الرعب وماطالع غيرهم وليلي ونهاري اطالع ولازم يكون ظلام , فالبدايه كنت اخاف وايد لكن عقب بديت افكر اقول هذا تمثيل والناس الي فيه ممثلين ومشهورين والي يصير بالمشهد مب صدق مب انحطت هالفكره ف مخي قمت ما اخاف p;