الاثنين، 14 يونيو، 2010

ما أبي مساواة



طوال السنة اللي طافت كنت بكندا عند زوجي قاعد يدرس دكتوراه الله يوفقه . 
لكن المشكله أن ذبحني بمبدأ المساواة الغير متكافئ .
يعني مثلا بالكويت مستحيل إن أطلع بروحي بعد 10 بليل أما بكندا فعادي الساعة 11 أو 12 وبغيت شيء أطلبه من زوجي يقول لي أمان روحي بروحج طبعا لأنه عايشين بداون تاون . 
و إذا اعترضت ولا قلت هذا شغل الشباب مو البنات رد علي انتوا تطالبون بالمساواة يالله جربوا . 
واي شيء قلتله او طلبته قالي انتوا تطالبون بالمساواة يالله روحي سويه حق نفسج . . . 
عاد أنا وصلت حدي قلت مدام نطالب بالمساواة ليش مو أنت اللي تطبخ وتغسل وتجابل اليهال . . الخ  .
وكان رده والله الحريم اللي يطالبون بالمساواة مو الرياييل إحنا مرتاحين مثل ما إحنا ما نبي مساواة .
طبعا أنا انغثيت قلتله أنا عن نفسي خلاص ما أبي مساواة أبي الامور ترجع طبيعي بس مستحيل لأنه المرأة هي المظلومة بكلتا الحالتين 
يعني خلوا الرياييل يشتغلون نص الشغل اللي احنا نسويه علشان يحسون . 
أي مساواة احنا مظلومين بكلتا الحالتين .
يعني الريال يقوم الصبح يروح شغله ويرد يتغدا وينام ويرد يقوم يروح الدوانية ( والله وايد متعب عمره خلي يخفف نشاطاته ) 
بينما المرأه تقوم الصبح تروح الدوام وبعدين ترد تسوي الغدا و تييب اليهال من المدرسة وتغديهم وتجابل دراستهم وتنظف البيت وتغسل غير أغراض الجمعية اللي يوميا لازم تشتريها ولا تنسون العشا تسويه وتعشي الريال واليهال و تسوي وتحط لين آخر النهار لين تنهد على السرير بليل .
قاصين علينا ويقولون مساواة هذا صار تعذيب نفسي هذه مساواة صارت لمصلحتهم وليس لمصلحتنا . 
من اليوم شعاري الجديد ما أبي مساواة أبي الريال يتحمل مسؤلية شوي .
ولا شنو رأيكم ؟ ؟ ؟ ؟

هناك 15 تعليقًا:

شاي الضحى يقول...

نحن لا نريد المساواة نريد العدل

:)

mazyona يقول...

هلا شاي الضحى
أي والله نبي العدل
كل شيء صاب في مصلحة الرجل

Ducati يقول...

مممم والله انا تكلمت مره مع واحد من الشباب عن هالموضوع

وصلنا حق ان المرأه تتعب 4 اضعاف تعب الرجل

وكنا مستغربين عن القدره العجيبه الي عندكم بالتحمل والصبر

لإن الرياييل عادة باله مو طويل مثل المرأه

Crazy Girl in aGood Way يقول...

عاد تدرين انا لو شنو مااطلع بعد ماتغيب الشمس .. اخاف

بالشتى تغيب الساعه 4 ولما اكون برا البيت تعالي شوفي ويهي ارجف واقرى المعوذات لووووووول

بالنسبه للمساواه ... انا اشوف يااختي على التعود من اول يوم زواج .. العيال من واجب المراه بس الطبيب للعيال للريال

المدرسه انا افضل المشاركه حتى لو اثنين يشتغلون .. يعني واحد يودي الصبح على دربه والثاني يردهم البيت

الجمعيه وحاجات البيت الضروريه وركزي على الضروري للريال

والله تبين تسوين كيكه والا طبق للزواره روحي اشتري الاغراض خخخخخخ

واذا الخدامه موموجوده لازم يساعد الريال في البيت ... عندي لو يمسك عيالي وانا انظف واطبخ اعتبرها مساعده

ذكرتيني بريلي مرة قلتله تعال شوف شلون البس البامبرز عصب هههههههه

وفهمته وقلتله ماابيك تغير البامبرز وانسى اطلب هالشي واصلا عيب اطلبه

بس لاسمح الله صار فيني شي ودخلت الطبيب .. تخيس بنتي على البامبرز

اقتنع وقام يطل علي اذا بدلت بنتي البامبرز



اللي ابي اوصله ... بالنسبه لاي شي يخص البيت والعيال لازم يعرفه الريال

عشان اذا صار شي لاسمح الله ماينعفس كل شي


شكرا على فشه الخلق :)

mazyona يقول...

هلا Ducati
تسلم على التصريح الحلو اللي يعطينا حقنا

mazyona يقول...

هلا كريزي غيرل
اي والله كلامج صح
بس حتى لو معودته من أول الزواج لازم تلقين بقدرة قادر انج تسوين كل الشغل
مشكورة على المشاركة الحلوه .

BookMark يقول...

وانا معاج مانبي مساواة :)

ماأسمح لأحد ان يعاملني كرجل !

نجــــري يقول...

هههههه,هذي حقوق المراة ذبحتونا تبون وتبون وتبون,تسلمين علي الموضوع

رورو الشخبوطه يقول...

اي مساواه اي بطيخ ..

اذا ماديا من يتزوج يزيد معاشه :\

احنا حتى صحيا نتعب اكثر منهم ..

عجبني رد كريزي ..

مادري شقول مبطوطه جبدي من هالموضوع..

عموما مشكوره..

mazyona يقول...

هلا بوك مارك
كلام حلو
مشكورة

mazyona يقول...

هلا نجري
عاد نبي حقوق بس نبي عداله
مشكور

mazyona يقول...

هلا رورو
مشكورة على المشاركة
ولا ينبط جبدج عادي

Engineer A يقول...

والله انا اشوف المره مسكينه خذت دورها ودور الريال .. والرجل مريح نفسه ومعطي عمره العافيه :))

وانا بعد اقول ان دينا أمر بالعدل والمساواة بالثواب والعقاب مو ان دور المرا يتعدى دورها الطبيعي وياخذ دور الرجل!

والله المستعان :)

mazyona يقول...

هلا Engineer A
كلامج صح وعدل
مشكورة على المشاركة

أبوفلان يقول...

عادي كل الرياييل جذي :-)

لازم تتحملون مثل ما احنا نتحملكم

وبعدين ما اعتقد الامان بكندا اكثر من الكويت ؟؟

بس الربادة تغير الحقائق دائما