السبت، 12 يونيو 2010

مسكينه السيارة


هلا شنو اخباركم 

اليوم قررت أعطي جدي سيارتي علشان يبدل الدهن فيها والماي والخرابيط مال السياره طبعا يوم وداها يدي طق على راسه 
رجع البيت يسألني أنتي من متى ما بدلتي الدهن والفلتر و أنا قمت الاستهبل ما أدري طبعا وانا صار لي قرن مو سآله عن السيارة  . 
يبونا نعرف هالسوالف أنا عارفة هذي شغله رياييل مو حريم يعني أنا يالله يالله أفكر بعمري يبوني أفكر بالسيارة بعد . 
يقولي جدي يحليله : المفروض دايما سيارة البنت تكون مرتبه وتكد وتعمر أنتي سيارتج شيء ثاني . 
يعني إذا بنت لازم سيارتي يكون عمرها طويل ومبدله دهنها كل شهر أنا ما أذكر الدهن إلا كل 6 أشهر .
صج تكسر الخاطر سيارتي ما أنصح أحد يشتري سيارة من استعمال حريمي لأنه مو فاهمين فيها شيء و مطلعين روحها بينما الشباب احسهم يخافون على سيارتهم ويدلعونها يعني أخواني دايما موديين سيارتهم تبديل زيت ومودينها تنظيف وسوالف وأنا يالله السايق ينظف أي كلام ادور شيء راحة مالي خلق عوار الراس . 
ما ينلام جدي يوم انصدم من سيارتي . الحلو انه وداني بره عند السيارة وقعد يشرح لي وين مكان الزيت وين نحط الماي وسوالف وانا مصدومة من صجة عباله بسوي كل هذا . 
يحليله حس انه ما في فايده مني أحس يأس جان يقول لي كل شهر عطيه السايق يشيك على السيارة وأنا يوم سمعت الحجي الضحكة شاقة والراس يهز صرت هندية . 
نصيحتي اللي يبي يشتري سيارة مستعمله لا تشتري سيارة استعمال بنات  لأنه من بره هالله هالله ومن جوه يفتح الله .

هناك 8 تعليقات:

شاي الضحى يقول...

وعليه علينا انا وامي واختي

كل وحده تخترب سيارتها تروح القراج بروحها تبديل دهن وماي وتواير وسفايف

كل وحده معتمده على نفسها

Question mark يقول...

احلة شي من برة هالله هاللة ومن داخل يعلم الله لوووووووووووووووول,تسلم ايدج

mazyona يقول...

هلا شاي الضحى
أفا
تروحون هالأماكن بروحكم الصراحة يخوف
تبين أقول حق جدي يودي سياراتكم مع سياراتنا

mazyona يقول...

هلا جبريت
نورت البلوق
اي صج تلقاها من بره شحلاتها السيارة
ولو تفحصها تلقى بلاوي

غير معرف يقول...

Nice article ..... very funny :)

mazyona يقول...

شكرا يا غير معرف

خاتون يقول...

لا يكون عطيتيها حق يدج
لأنه سيارتج وصلت 390 دينار
بيعيها و تقاسمي المبلغ مع يدج
بس جنه طيحوا حظ السيارة بس انتي أدرى شوفي صالحج ههههههههه
موفقة ^_*

mazyona يقول...

هلا خاتون
لا طالبه فيها أكثر عاد بالأمور هذي ما ينقص علي
أفا عليج الجد والعايله كله بزنس معلمينه على هالأمور يوم توصل 2500 بعت
مشكورة على الرد والمرور الحلو
تسلمين