السبت، 5 يونيو 2010

صندوق ذكرياتي

اليوم أختي سافرت مع ولدها الكتكوت فحسيت بإكتئاب خفيف قمت أحوس في شقتي ولقيت صندوق ذكرياتي وي من زمان ما طليت عليه 
قلت خلني أجدد ذكرياتي تدرون كل واحد أكيد عنده مثل هالصندوق أنا صندوقي من أيام الابتدائي . 



خلوني أكلمكم عن صندوق ذكرياتي أنا كنت من محبين التعرف على الأصدقاء بالرسائل وكذلك كنت أحب أراسل بنات خالي في دبي تدرون أيامنا ما كان عندنا انترنت ولا موبايلات كنا معتمدين على الرسايل كنت حافظة مكتب البريد من كثر ما رحت أما الحين مو متأكده إذا الكويت فيها بريد ولا لا 
المهم خلونا نشوف شنو لقيت بصندوقي . . . 


من كثر الرسايل حسيت أني صرت مثل هنديتنا كله رسايل . 


من كل دول العالم كان عندي أصدقاء وناسه كانت أيام مع انه انقطعت هذي الهوايه بس حبيتها وايد.


ضحكتني هالعبارة ( شكرا لساعي البريد ) والله كنا عايشين جو ثاني 


واو لقيت مذكرتي أيام الابتدائي والمتوسطه وناسه وايد بنات تذكرتهم من كلماتهم الحلوه 


أحس الكلمات كانت صادقة المشاعر حسستني بطفولتي الجميله 


أحلى الذكريات أتمنى لو كنا على تواصل أو مثل الدوله الغربية بعد 25 سنه يسوون لنا المدرسه إعاده جمع على الأقل نشوف رفيجاتنا ونتواصل معاهم .


هذي صوره صفنا بالابتدائي الشاطره تعرف أنا أي وحده فيهم . 
ودي لو أجتمع فيهم كانوا أعز صديقاتي لكن الظروف فرقتنا . ذكريات حلوه اللي تلقى صورتها لا تزعل تطرش لي اميل علشان نتواصل . كنا قمة البراءة .


أكيد تتسائلون شنو هالأحمر هذا هذا ما عرفتوا 

دفتر تليفونات شخباري مال سنه مليون وحطبه  تراثي 


تتوقعون لو دقيت على رفيجاتي اللي عندي رقمهم يكونون للحين نفس البيت .  أدري أفكار مجنونه بس حبيت أشاركم أفكاري العجيبة والغريبة .


أوه لقيت وصل أسهم كنت مشاركة فيه في المدرسه تتوقعون الحين لو طالبت فيه جم يطلع لي فلوس يعني استثمروا فلوسي ولا نفس اللي عندنا الله يرحم .
ترى أقل من مليون ما أقبل استثمار بذمة وضمير  .

أكيد لاحظتو بين الكلمات حروف غريبة
وأنا أقرأ الرسايل تذكرت أن كان عندنا شفره خاصة فينا كنا مخترعينها لنقل الأسرار بينا بطريقة محد يكتشفها وكان كل وحده عندها ورقة الشيفره والله شكله كان أسرار دوله مو أسرار بنات .
ضحكني مشاءالله كنا قمة الابداع ما يطوفنا شيء 

عاد ما راح أحط لكم الشفره علشان ما تعرفون أسراري ( ما أدري هتلر مو حنون ) 


بطاقات عيد ميلادي وعيد الحب وناسه حسيت أني مراهقة من جديد 


ذكريات لايمكن أن يمحيها الزمن قلوب وورود مجففه ذكرى أصدقاء أتمنى وجودهم طول العمر بجانبي



كنت أحفظ القرآن كانوا يعطونه كل جزء على شكل شجره تفاح مكتوب فيها اسماء السور وكنا كل ماحفظنا سورة أو نصف سوره كنا نلونها علشان نحاول كل وحده تبين أن شجرتها هي ملونة كلها كان تنافس حلو وطريقة خفيفة وحلوه .

وايد ذكريات وصور ورسايل بعضهم أحضرت الدموع لعيوني لأنه كلام صادق النية والبعض أحضرت البسمة لشفتاي لأنه كان ذكرى مضحكة وأوقات جميله . 
نصيحتي لكم دائما استرجعوا هذه الذكريات الحلوه وضعوها في صندوق لآخر العمر .

هناك 14 تعليقًا:

غير معرف يقول...

يحليلج طلعتي نفس اسمي :)

يا حلو اسمنا :)
اعترفي انتِ اي وحدة بالصورة :]

mazyona يقول...

هههههههههههههههه سميتي أكيد حلوه
انا أحلاهم
قاعده على الأرض وشقره .

رورو الشخبوطه يقول...

خوش ذكريات ماشاءالله..

يبيلي ايمع اغراضي :(

ومشكوره ..

هديــل يقول...

واااي وناسة :)

سمية امي :q

انتي صندوق الذكريات انا جنطة الذكريات :)

مشكووورة =)

mazyona يقول...

هلا رورو
اي والله ذكريات حلوه
انصحج تجمعين علشان يوم تعيزين وتصيرين مليون سنه عمرج تذكرين الاشياء الحلوه

mazyona يقول...

هلا هديل
وناسه وايد ناس على اسمي
جنطه ذكريات وناسه

شاي الضحى يقول...

وناسه

حتى انا عندي درج الذكريات

في اشياء عندج نفس الي عندي

امبيييييه الصوره نفس صورنه

عندي وحده نفسها بالضبط ونفس الزوليه وورانه شير مصورين مع الصف وهم زعفرانه عندها نفس الشي بالضبط

بس مو نفس المدرسه

احلى شي انج تخشينهم والذكريات حلوه :)

mazyona يقول...

هلا شاي الضحى اي والله وناسة
وخاصة يوم تكتأبين حلو ترجعين ذكرياتج
الظاهر ان المصور كان عالمي كل المدارس مسويها نفس الحركة

وحده يقول...

لقيت وحده تشابهني بالصوره P=
بس آنا من الدفعات اليديدة!
بس لحقت على سهم المقصف ! لول

يعطيج العافية .. تدوينة عجيبه !

mazyona يقول...

هلا وحده
تسلمين على المشاركة الحلوه

ANGEL HEART يقول...

ونااسه خووش ذكريات

يا حلو ايام اول

mazyona يقول...

هلا انجل هارت
صح يا حلو أيام أول
الحين من عصر السرعة الواحد ما يلحق يجمع ذكريات حلوه .

غير معرف يقول...

شعووور جميييل وانتي نااويه تروحيين تفتحين صندووق ذكريااااتج
وانتي اطالعييين كل ذكرى من صور من ورد من واوراق صغييره مشقوقه من دفتر اشيااء واشياااااء

وبالفعل قبل كم يوم كنت انا واختي بطلنا صناديقنا بس مو كل شي وريتها ورتني وكل ماطلعت شي ولا هي طلعت شي نقوول شخباااااااااااااااري صج اياااام وكل وحده تقول اتذكرهااا يوم عطتج هذي الخ...هههههه بس صج الذكريااااااااات جمييييييييييييله

ويعطييج العافييه والله وعلى فكره ترا دفتر التلفونات نفس مالي وكنت اقول نفسج لو ادق يطلع بيتهم هههههه


((فمان الذكريات الي صداها باقي ماغاب))

غير معرف يقول...

A fascinating discussion is worth comment. I think that you need to write
more about this issue, it may not be a taboo subject but typically folks don't speak about these issues. To the next! Best wishes!!

Look at my page: grupa kreatywna