الأحد، 23 مايو 2010

مساكين الطلبه


عاد رديت  للدوام صار لي شهر وانصدمت بالمناهج العلوم حسيت أني أدرس ثانويه عامه مو رابعة وخامسه ابتدائي 
صج حرام عليهم من منهج عن البيت والأدوات والمعلومات مبسطة صار المنهج فيزياء وكيمياء وأحياء ليش يعني عبالهم عيالنا عباقرة ولا شنو هذا ما يمنع في ناس شاطرة بس حتى الشطار مساكين كرهوا المدرسه بسبب المنهج العجيب اللي فيه معلومات خطأ وكلمات مو عربية لبنانية ترى حرام عليهم هاليهال اللي أحس انه مخهم مل من الدراسه قبل يا حلات الابتدائي كل اليهال يحبونه الحين يحس الياهل بضغوط نفسية ودراسية ما ألومهم . 
المشكله امتحانات النهائية للكورس راح يدرسون الكتاب كله ليش حرام وااااايد الكتاب كله متروس معلومات وتعاريف يلوع الجبد أنا المدرسه مرات أقرأ المعلومه وأحاول أحفظ وما اتلخبط وين أنا دارسه هالمعلومات بالكلية وهم مساكين بالابتدائي 
كل ما وحده سألتني شنو تشتغلين بس أقول مدرسه علوم طاحت فيني أنتوا وأنتوا وحرام عليكم عيالنا كأنه أنا اللي حطيت القرارات الهبله هذه بس بصراحة ما ألومهم من الويل اللي يشوفنه بتدريس عيالهم صرت أحرم أقول أني مدرسه .
وصاروا الابتدائي كله يآخذون دروس خصوصية شنو هذا احنا قبل يالله لين الثانوي ويالله بس الحين من ابتدائي الله يستر على الروضة أخاف باجر ندور دروس خصوصية لعيالنا .

هناك 8 تعليقات:

كوكتيل يقول...

فعلا عزيزتي القرارات عندنا غير مدروسه

يعني أول شيء لازم على الأقل يخلونه منهج تجريبي يعرفون من خلاله قدرات الطلبة وهل يناسب مستواهم ولا يحتاج مراحل عمرية أكبر على سبيل المثال وشنو التعديلات اللي ممكن يحطونها في ضوء هذه التجربة ؟


ولازم يكون في منطق عند الناس اللي تحط هذي المناهج فعلا كاسرين خاطري أولياء الأمور مبتلشين عدل المساكين
والطلبة حرام راح يكرهون التعليم مبجر حييل ليش جذي ما أدري ؟

يعطيك العافية موضوع مميز فكرته وايد مهمة :)

شاي الضحى يقول...

الله يعينهم والله

امبيه صدمتيني شنو كلام لبناني؟!!!!

ليش مو لغة عربيه ؟!

صج ان المناهب صعبه واشوف وايد من اهلنا يشتكون

بس والله لو تطلعين ايام الاسبوع لي الساعه 11 بليل وتشوفين اليهال يحوسون بالمجمعات والسينما مع اهاليهم ولا يجابلون ولا يدرسون

حتى لو منهج صعب على الاقل جابلوا شوي

واليهال من كثر ما يسمعون اهلهم يقولون مناهج صعبه وصعبه خلاص اهما مخهم تبرمج ان صعب وماقاموا يهتمون ولا يشدون حيلهم

mazyona يقول...

هلا كوكتيل
معاج حق يبي له قرارات مدروسه

mazyona يقول...

هلا شاي الضحى
صح في ناس تلقينهم مو هامهم الدراسه وفي ناس والله الأهل و الطلبه حارقين قلوبهم على الدراسه بس هذه ا بتدائي يعني لازم يخففون عليهم شوي

@alhaidar يقول...

التربية في الكويت كلها يبيلها إعادة هيكلة .. والله يستر على قولتج ..

تحياتي ..

mazyona يقول...

هلا أحمد
شرفني مرورك وكلامك عدل يبيله إعادة هيكله بس منو اللي يسمع

غير معرف يقول...

Thanks for ones marvelous posting! I quite enjoyed reading it, you are a great author.

I will make sure to bookmark your blog and may come back very soon.
I want to encourage one to continue your great posts, have a nice holiday
weekend!
My page - GFI Norte

غير معرف يقول...

For most up-to-date information you have to pay a quick
visit world-wide-web and on internet I found this site as a
best web site for most recent updates.

Also visit my web-site :: pracownia reklamy
my page > dolnoslaska agencja reklamowa