الخميس، 4 مارس 2010

مواقف تضحك ولا تفشل ما أدري ؟

يمكن اللي كان متابع مدونتي قرأ موضوع قصة زواجي و شلون صار المهم اللي تبي تقرأه هذا الموضوع 


المهم طبعا ملجنا وردينا البيت ام الولد دقت تليفون وقالت راح تي بيتنا العصر هي ولدها طبعا أنا توني مالجة رحت الصالون وسويت شعري والميك آب والملابس الكشخة تدرون أول مرة يشوفني زوجي بدون حجاب لازم اكون غير وصلوا ودخلتهم أمي بدوانية قعدت جدتي معاهم المهم دخلت وسلمت طبعا كنت مستحية مو وايد يعني وسط  وقعدت عند جدتي يعني مو عند ريلي فشله أمه يمه و توني ما أعرفه علشان أرز ويهي يمه .
وشوي أمه تقولي وقفي يمه أبي أقط عليكم فلوس وحلاو تدرون عجايز لهم سوالف بس حلوه المهم وقف وقطت علي فلوس وحلاو ولا الحلاو بالأرض و تي الخدامة بتشيل الحلاو وتنظف وتقولها جدتي لا خليهم وتناديني أشيلهم أنصدمت صدمة عمري أنا حتى الكلينكس ما أشيل وتقولي جدتي شليهم والمشكله كله طايح تحت ريل ريلي ويهي يصفق ألوان وأنا على الأرض أشيلهم مسكين ريلي حس اني متفشله فساعدني شوي .
طلعت من الدوانية على الصالة عند أمي وعماتي أشتكي وهم يضحكون علي قلتهم ماني داشه مره ثانية عندهم مو عارفة أكلم الولد كلمتين .
ودي أعرف ليش جدتي خلتني أشيل ؟؟؟؟؟؟؟؟؟؟؟؟؟؟؟ 
صج موقف ما يتنسى .
الموقف الثاني يوم عرسنا أنا وزوجي قاعدين على الكوشه شحلاتنا معاريس المهم الناس نادوهم على العشا ما بقى بصاله غيرنا وغير شويه أهل المقربين كنا نصور أنا وياه وشوي وبنات خالت زوجي أشوفهم يايين عندنا على الكوشه قلت بيباركولي ويسلمون علي 
ولا خلصوا سلموا علي ويروحون يسلمون على ريلي وأشوف الأخ مد إيده وسلم عليهم ويسولف ويتضحكون بعد طبعا أنا عندي الواحد ما يمد إيده ويسلم إلا للمحارم أدري معقده بس يشلون يتجرأ ويسلم على بنات خاله أنا بالكوشه حدي معصبه و أنطر بنات خاله ينزلون من الكوشه ويقعد ريلي وأقوم أرفسه على ريله يمكن أنا أول وحده تطق ريلها بالكوشه و المشكله طالعه الطقه واضحة بشريط الفيديو إجرام أدري
وريلي يسوي نفسه بريء يقول يعني مدت ايدها فشله ما أسلم عليها تصدقون من يومها ما أحب بنات خالته . بس موقف كان حده .


هناك 10 تعليقات:

Hope يقول...

لوووووول
يحليلها يدتج ضحكتني
بس شنو السر يا ترى؟ ليش خلتج انتي اللي تشيلين ؟
كاااك اتخيل شكلكم من اول يوم طاقته
مسكين كسر خاطري.. يمكن صج ما يبي يحرجها

الله يخليكم لبعض و يهنيكم يا رب

خدمات البحث العلمي يقول...

هههههه

ياحليلك والله مواقف محرجه خاصه الاول

جدتك فديتها يمكن تبي تعلمهم انك سنعه وتعرفين تضفين

الله يخليلك زوجك

رورو الشخبوطه يقول...

الله يتمم عليكم يارب..

الزاهر يدتج ماتبي الخدامه تقرب من ريلج :)

mazyona يقول...

هلا هوب
اي والله شنو السر
ريلي يقول يمكن علشان تعلمني منو boss

mazyona يقول...

هلا مبدعة
اي والله بس احراج
تسلمين على الرد

mazyona يقول...

هلا رورو
صج يعني تي فيني مو في الخدامة
مشكورة على الرد

Crazy Girl in aGood Way يقول...

خوووش ذكريات بس سالفه الحلاو اول مرة اسمع فيها واحس حييل حلوة ماادري ليش اعجبتني

اما مده اليد حبيبتي انتي مومعقده .. اصلا مايجوز بس ماادري ليش بعض الرياييل يقولون فشله المراه مدت ايدها انا مايصير ماامد !!!!!!

mazyona يقول...

هلا كريزي صح لسانج
انا مثلج اقول حرام

AM.SA.CHANNEL يقول...

هههههههههه، أحلى شي سالفة الكووووشة تظحيييييييييين و الله .. !!

mazyona يقول...

هلا AM.SA.CHANNEL
مواقف لا تنسى