صج الثالثة ثابته

صج الثالثة ثابته 

 

أنا ساكنة بأوتاه بكندا بعمارة شقتي الدور الثامن والحلو 

في نظام كندا انهم يحطون جرس انذار الحرائق في كل دور 

علشان لا سمح الله إذا صار شيء .

المهم أول مرة سمعنا جرس الإنذار اخترعنا أنا وزوجي 

وعيالي طبعا مو متعودين و بسرعة البرق لبسنا ونزلنا بالسلم 

8 أدوار ونطرنا تحت بره العمارة طلع انذار كاذب 

المره الثانية سمعنا جرس الإنذار كنا نتغدى هدينا غدانا

وركضنا هم 8 أدوار لين تحت وطلع مجرد تجربه علشان 

يتأكدون انه يشتغل يعني تعبنا على الفاضي 

المهم المره الثالثة اللي سمعنا جرس الإنذار كنا لا مبالاة 

وقاعدين نضحك أنا وزوجي وأقوله تخيل هالمره تطلع 

صج نفس قصة الراعي والذيب المهم 

انا كنت تعبانه وقلت له مستحيل أنزل 8 أدوار الحين

طرشته هو يشوف الأجواء ويرد لي 

اول ما فتح باب الشقة وريحه الدخان تخيلوا الحريق كان 

بدور الثالث واحنا بثامن واصلنا الريحه 

المهم من الخرعة كل واحد لبس اي شيء

احنا الوضع بره برد وثلج عاد على السريع حاطه

البوت بدون ما أصكره والبالطو بس حاطته واركض 

وحجابي مأساة شويه ويطيح اما زوجي من السرعة 

لابس نعال زنوبه والبالطوا بطريج لبسه المهم تذكر يأخذ

الجنطة اللي فيها جوازاتنا هذا الأهم المهم نزلنا 

هالمره 8 أدوار واحنا مخترعين عاد الناس اللي نازل وشايل 

قطوته ولا كلبه واللي معاه عياله . بس الحمدالله 

كانت المطافي تحت و بسرعة سيطروا على الوضع 

ومافي اي احد تضرر . 

بس خذينا درس أنا وزوجي مهم 

والحين اذا طق الجرس غشمره ولا صج احنا أول 

المستجيبين خوش درس .