أنا ومجلس الأمة

مثل ما أنتوا عارفين اليوم كانت الجلسة لإقرار كادر المعلمين وناظرتنا ما قصرت طلعتنا علشان نساند ونحضر الجلسة انا كنت مستانسه لأنه راح احضر جلسة مهمة تخص المعلمين .

المهم أول ما وصلنا الزحمة شيء غير طبيعي مافي مواقف بعد اللف والدوران وقفنا مكان بعيد ومشينا لين المجلس بالحر والشمس يعني جهاد بصراحة . المهم يوم وصلنا ولا الناس متكوده بره على الباب مو راضيين يدخلونهم والصراخ من كل صوب المهم احنا قلنا للمسؤل ان احنا حريم لازم يفتح لنا باب ثاني لكنه مع الأسف الظاهر ان ماعندهم هالسوالف ما رضى يفتح لنا الباب ونطرنا بشمس تقريبا نص ساعة ويقول لنا وقفوا دور مع الرياييل يعني احنا كله 10 مدرسات ما قدر يدخلنا قعد يسوي سوالف .

المهم بعد الحجي و كل واحد يقول شيء رضى يفتح لنا الباب . 

بعد ما دخلنا الجلسة و قعدنا كان شيء حلو ان حضرنا بس بصراحة كل واحد من النواب يتمشى ويسولف ومحد منتبه شنو يقولون الباقي يعني عكس اللي توقعنا . 

واحنا قاعدين عندهم قوانين عجيبة كل شوي ياي الشرطي ويقولنا ممنوع تحطون ريل فوق ريل بعد شوي ممنوع التليفونات بعد شوي ممنوع التصوير يعني لاعت جبدنا كل شيء ممنوع غير اللي سحبوا بره لأنه ما أدري كان يصفق ولا شنو يقول .

وقعدنا ناطرين من الساعة 9.30 لين الساعة 12 وما تكلموا عن الكادر قالوا بعد الصلاة بصراحة ملينا و ورانا عيالنا نبي نيبهم من المدارس فقررنا نطلع من المجلس . 

يعني روحتنا ما منها فايده بس تجربة حلوه بس توبه .