صف 4 / 1

صف 4 / 1 

دخلت احتياط صف 4 / 1 

بنات بعمر الزهور لكن السوالف اللي تطلع منهم حلوة و عجيبة تذكرني بأيام الطفوله . 

يوم دخلت عزمتني طالبة على حفلة حجابها 

ما أدري من متى لبس الحجاب صار له حفلة ( بس فكرة حلوة تشجع البنات على لبس الحجاب ) 

كان في مجموعة من الطالبات همهم الأول والأخير الأغاني والمسلسلات التركية والخليجية . 

يعني كل سوالفهم كان عن هذي الشغلات بصراحة حسيت ان بنات صغار لازم ما يعرفون هالسوالف بس للأسف كل جيل صاير يعرف أكثر من الجيل اللي قبله . 

أنا بصراحة ما أحب أتابع لأنه احس المسلسلات كلها صايره موضوع واحد وستايل واحد وحتي تلقى نفس الأبطال بكل مسلسل صار لي اكتئاب من القصص الحديثة .

طبعا في مجموعة بنات اللي قاعدة تلون واللي قاعدة تحل الواجب واللي تسطر وتزين الدفتر .

وفي بنات قاعدين يكتبون مذكراتهم ويومياتهم طبعا ذكروني بنفسي لأني حاولت أكتب مذكراتي بس ما قدرت لأنه أخواني دايما يقرون مذكراتي ويهددوني فيها .

وفي مجموعة قاعدة اسمع سوالفهم كل وحده قاعدة تتفلسف على الثانية اللي تتكلم عن يوم سافرت امريكا واللي تتكلم عن ملابسها واللي عن أحدث الصرعات بصراحة حسيتهم دوانية حواء مو بنات . 

وطبعا في مجموعة ياية يمي ويسوون معاي تحقيق 

الأسئلة المعتادة : 

- أبلة انتي متزوجة ؟ ( ليش تبي تخطبني ) 

- ابلة عندج عيال ؟  ( تطمن على مستقبلي )

ابلة جم عمرج ؟ ( ما تبي شهادة الميلاد بعد ) 

- ابلة انتي كويتية ؟ ( ما أدري منو حطهم بقسم الجوازات ) 

يعني يسوون تحقيق عن قصة حياتي كلها وبعد ما يخلصون كل وحده تبدأ بقصة حياتها وأمها وين تشتغل وجم اخوان عندها وهكذا . . . 

وفي المجموعة اللي تلعب ألعاب لازم يشركوني يعني ما يصير كل وحده تلعب مع الثانية لازم يحوشني طشار . 

طبعا اللعبة شخباري من أيام قبل ما أدري إذا تذكرونها 

اللعبة البنت تمرر ايدها وانتي تقولين ستوب وانتي وحظج شنو يطلعلج انا طلع لي . 

عمري 120 سنه 

سيارتي فراري 

ساكنه بكوخ 

البلد هند 

وهكذا . . . 

المهم استحملت لين طق الجرس وانحشت من الصف