الخميس، 16 سبتمبر 2010

ظلم



أرحب فيكم بعد رمضان الخير وأهنيكم بالعيد السعيد 
طبعا مجرد ان خلص العيد بدأ عندنا الدوام ( المدرسات ) 
المشكله مهنة التدريس حلوه لكن الإدارة والتوجيه من الطلبات الزايدة والضغط علينا قمنا نكره المهنه . 
وكل يوم قوانين شكل والمديره بعد تحط على مزاجها قوانين 
يعني من صوب الوزيره اللي زادت الدوام بشكل غير مبرر لين 1,30 قلنا يالله وبعدين تحط يوم الثلاثاء تزيده زياده لين 2 
بصراحة حرام ووايد يعني أنا بيتي وايد بعيد عن المدرسة يعني لين أوصل البيت يكون حسب الزحمة 2,30 .
انزين شنو ذنب بنتي اللي بالروضة هي تخلص مبجر يعني لازم تنطرني لين أخلص دوام علشان اوديها البيت . 
اوكي هذي الوزيره و الوزارة انزين الناظره ليش تحط على مزاجها قوانين تحبط . 
تقول الناظره العرضي ممنوع أول الأسبوع وآخر الاسبوع يعني أحد و خميس قلنا أوكي الحين قرارها الجديد حتى يوم الثلاثاء ممنوع تدرون لأنه الدوام لين 2 . 
يعني إذا صارت لي ظروف أو أبي أمرض لازم بس الإثنين والأربعاء والله حاله يعني هذا شيء بالمجهول قدر أنا ما أقدر أحدد متى يصير . 
بصراحة شكلنا كلنا بنستقيل ونقعد ببيوتنا أرحم لنا من الذل . 
يعني مو كافي هم التحضير والتدريس وعمل الوسايل لازم الحين يطلعون العطله من عيونا . 
بس ما أقول إلا حسبي الله ونعم الوكيل حرام عليهم اليهال واحنا يعني الابتدائي من الساعة 1 مصكر مخهم وعينهم وين بتقعدونهم أكثر . 
مو بطريقة هذي ترتقون بتعليم يعني أنا وحده جربت مع ولدي مدارس كندا والله فرق هناك ماعندهم نص الخرابيط اللي عندنا وتعليمهم يعتبر الأول في العالم واحنا كل مره ننحدر لمستوى أسوء . 
ما أطول عليكم بس حبيت أفضفض لكم 
تدرون ( قلبي متروسه )  

هناك 22 تعليقًا:

Unique Girl يقول...

والله صاجه حرام وظلم

يعني انا بعرف من زود الإنتباه تبون تزيدونه

تكفون مانوصل الساعه 12 الى كل بنيه متنحه اكثر من الثانيه

يعني كلللللش ماعندهم سالفه ابد

والله يعين وحسبي الله ونعم الوكيل

وانتي بعد بنتج حرام مايصير تخلينا جذيه بالروضه انا مره امي تأخرت علي بالروضه وليلحيني اذكر الموقف لأن كان يخرع ماكو احد له خلقهم بعد يقعدون عشان امهاتهم متأخرين

الله يعينا على الدنيا بس

mazyona يقول...

هلا Unique Girl
اي والله كلامج صح
يعني هالقوانين وهقتنا

she is me يقول...

صح .. أصلا أنتو أكثر ناس مظلومين ..

على ابو عطلتكم .. شالعين مراتكم بالدرجات والكنترول

على ابو دوامكم يخلص مبجر .. شالعين عينكم طول الدوام أوامر وشغل زايد

على ابو رواتبكم .. شالعين قلبكم بالطلبات والمناوبات والمراقبات وكارفينكم كرف

ماتقوليلي شخلو فيكم
جسد .. بدون مرارة ولا قلب ولاعين^^

لازم يعطونكم بدل قلب ومرارة وعين..
^^
شرايج

Engineer A يقول...

الله يعينكم والله .. مالكم الا الصبر واحتساب الأجر ..

اتصدقين سالفة العرضي أول وآخر الاسبوع وانه ما يصير الا بنص الاسبوع هم صايره عندنا يعني اهو اسمع عرضي .. طاريء مو انا اتحكم متى يصير شي يعجب بصراحة !!

الله المستعان

مبدعه يقول...

الله يعينك

من ناحية العرضي ممنوع أول الأسبوع وآخر الاسبوع
هذي كثير يسوونها حتى في بعض الدوائر الحكوميه

هديــل يقول...

الله يعيييييينكم وينصركم :)

وبعد من صجهم اهلي كانوا يبوني ادخل في مجال التدريس ( على جثتي ) من كلامكم تعقدت لووول

Question mark يقول...

يعطيج العافية,انا بافهم وزارة التربية وين بتوصل ويا قرارتها,صج ماكو شغل

cho cho يقول...

الله يعينكم يا المدراسات من جد شي يقهر

لا والقهر الأكثر انه أنتو تكرفون وغيركم في بعض

الدواءر الحكوميه ينامون ومعاشاتهم تنزل لهم كامله

الله يصبركم بس علي هالنظام.

Hanan يقول...

الله يعينكم والله أحبطت :(
أنا أحب التدريس بس من كثر ما أسمع كلام مو زين شكلي بهون!
صراحة كلامج صح وحرام تتأخرين على بنتج ولازم تشوفين لج حل يا إما تقدمين على وظيفة ثانية أو تشركين بنتج بباص لليهال وفيه مراقبة والحافظ الله.

mazyona يقول...

هلا she is me
اي والله يطلعون كل شيء من جبودنا
أصلا مافي مدرسه تقاعدت صاحية كله مرضى من القهر .

mazyona يقول...

هلا Engineer A
اي والله كل شيء قدر وهذا حق ليش يتحكمون فيه

mazyona يقول...

هلا هديل
اي من صجج المينون يدخل التدريس احنا ودنا ننحاش

mazyona يقول...

هلا مبدعة
صح بس نص الاسبوع بعد
شنو بقى من أيام شيلوه كله وريحونا

mazyona يقول...

هلا Question mark
اي والله الوزارة ما تدري شنو تسوي

mazyona يقول...

صح كلامج يا جوجو
ناس مرتاحة وناس بتشتغل بذمه وضمير
وحاسدينا على شغل التدريس خلهم يجربون اسبوع

mazyona يقول...

هلا حنان سميتي
هو التدريس وتعامل مع الطلبه حلو وممتع بس الأشياء الثانية الاداره وطلباتهم والتوجيه هو اللي يطفش

Hope يقول...

السلام عليكم

واي الله يعينكم على هالوزارة الدايخه
كل يوم لهم قانون، كل يوم قرار يديد، شيل و حط و المدرسين و الاجيال القادمه اهما اللي ماكلينها

و بعدين الناظره مو من حقها تحط قوانين من عندها، مو بكيفها، ولا من حقها
الله يعينكم بروحه شغلكم اييب اليهد بعد يحطون لكم ناظره جذي

و حدهم ما عندهم سالفه بيزيدون الدوام، الحين ما لقو الا زياده وقت الدوام عشان يحسنون الانتاج مالهم
شدعوه عليهم ما شافو الجو؟ يبون اليهال يموتون من الحر؟
و بعدين على قولتج كا دول بره شخلاة طلبتهم و مستواهم التعليمي مو من زياده وقت الدوام ولا شي بس لي درسوا و حطو قرارات عرفوا يحطون.
وعليه بس ع الاجيال القادمه ملوتنا، الله يستر شلون بيصيرون

mazyona يقول...

هلا هوب
اي والله كلامج صح محد مآكلها غير اليهال والمدرسات

Katkoota xD يقول...

الفكره حلوه

ان يبون يزيدون من التعليم و جذي

بس الوضع اللي احنا فيه ما يساعد

بعض الطلبة مالهم خلق لا دراسة ولا شي

و بعض الابلات مالهم خلق يدرسون او ما يوصلون المعلومه صح

و في ابلات و النعم فيهم يفهمون الطلبة بسرعة و ماشين بالمنهج صح معاهم

يعني القرار صح و بنفس الوقت غلط .. يبيله ناس تسااعد

و عن بنتج الله يعينج .. المفروض بعد يوفرون مواصلات لهم

t7l6m.com يقول...

الله يعينكم
ومع إني مو مدرس لكن أشفق على أهل هذه المهنه
الوزاره تتخبط ،شلون يطولون اليوم الدراسي ويتركون الأيام إللي تسبق العطل أو تقع بينها تروح هدر
طلبه مايحضرون وإللي يحضر ما يدرسونه
بعدين أطفال بالإبتدائي والمتوسط ليش يعطونهم عطله قبل إمتحانات آخر السنه ،إستثمروها وراجعوا للطلاب المنهج ،أو القصد منها راحه المدرسين الخصوصيين وزيادة ساعاتهم المتاحه للترزق
وأخيرا،وآسف على الإطاله،النظار والإداره مرات يطلعون عقدهم على المدرسين والمدرسات وحتر الأخصائيات ليما يطفشون
الله يعينكم ويوفقكم وجزى الله المخلص منكم الف خير

ANGEL HEART يقول...

واي الله يعينكم والله التربيه من مسكوها الحريم تلعوزت

صفحات مُلطخّة بحروفي يقول...

سلكْ التدريس مُجهد جداً .
الله يعينجْ