الاثنين، 19 أبريل 2010

موقف ما أنساه ؟

ما أدري تدرون اني معلمة طبعا من حظي الحلو .
المهم أنا معلمة إبتدائي أحب اليهال وايد مر علي موقف ما أنساه خلال تدريسي حبيت أقولكم ياه 
كنت أدرس صف الرابع الابتدائي والبنات في مدرستي دلع على الآخر ما أدري صايرين دلوعين زياده 
كان عندي أختبار علوم وقاعده أراقب البنات أنتبهت ان البنت الشاطره عندي قاعده تغش طبعا كلمتها وقتلها ليش تسوين جذي كان عذرها ان السؤال مو عارفته طبعا قلتها راح أنادي ولي أمرج المشكله كان عندها عادي مو مهم ما خافت جمعت الأوراق واسمع البنات يتناقشون أنا منو أحب أكثر وحده يحليلهم ويايين يسألوني البنت اللي غشت كانت واثقة أني أحبها أكثر وتقولي بكل ثقة أدري أبله أني أكثر وحده تحبينها طبعا أنا وقتها كنت زعلانه منها لأنها غشت وأقول لها لا أنا أحب البنات الهاديين اللي يسمعون كلامي كل هذا عادي أدري 
بس نطروا شنو صار . . .
ثاني يوم ياي ولي أمر الطالبه الشاطرة عند الناظره يشتكي علي وتناديني الناظره وأشوف الولي الأمر معصب .
طبعا أنا قلتله بنتك اللي غلطانه لأنها غشت وأنا راح أنقصها درجات و يرد علي ويقول لا أنا مو هذا اللي أشتكي فيه اذا غشت تبين تنقصينها أو تكسرين رأسها عادي كيفج أنا راضي وأسأله عيل شنو السالفة ؟؟؟؟؟؟؟؟؟
ويرد علي أنتي قايله حق بنتي انج ما تحبينها .
والله ما أدري وقتها كنت أضحك ولا أبجي 
قلتله نعم احنا في مدرسه أنا مو مجبوره أحب بنتك أنا يايه أدرسها وأشوف الناظره والوكيله ماسكين ضحكتهم بالغصب ويقول لا انتي الحين عقدتي البنت ونفسيتها تعبت وكرهت المدرسه شدعوه ما أدري شنو مسويه لو ذابحتها أهون .
المهم ويتناقش وبعدين تهديه الناظره المهم ويطلع وانا مصدومة من صجه.
كان موقف ما أنساه بحياتي الله يعين المدرسات جذي وصل دلع البنات للحين كل ما أذكر الموقف أضحك .

هناك 11 تعليقًا:

Question mark يقول...

ههههههههههه خوش موقف الله يعينج علي البنات دام الدلع جذي

شاي الضحى يقول...

لووووووووووول

من صجهم

معلومه يديده توني ادري انج ابله ههههه

الله يعينكم على بنات هالايام وشطانتهم

شعدوه عليه ولي الامر ياي معصب مو غصب تحبينها

هذا حب بالغصب هههههههههه

مشكوره :)

joe يقول...

الجيل اليديد دلوع حيل

بس احس المفروض ماتقولين انج ماتحبينها لأنها حرام وتوها ياهل ماتعرف بالدنيا شي , و المفروض انج تعطينها دافع حق الدراسه وتستمر على نجاحها بدون اي كره او معوقات

وهذي وجهة انظري اتمنى انج تتقبلينها

ويعطيج الف عافيه

نمووول يقول...

ليش ما تحبين بته :@

الله يعينكم والله ..
حبيها وكسري راسها (خوش حل موو ؟)

mazyona يقول...

هلا بحر الصمت
معاج حق جيل دلوع

mazyona يقول...

هلا شاي الضحى
اي والله حب بالغصب

mazyona يقول...

هلا المباركية
أخاف انت ولي الأمر
بس أنا ماقتلها اني ما أحبها
أنا بس قلتلها أن في وايد بنات أحبهم أكثر
وبعدين أنا كنت زعلانه منها لأنها كانت تغش

mazyona يقول...

هلا نمووول
مغبر صار لك فتره ماتمر على البلوق
بس خوش حل
أحبها و أكسر راسها

Unknown يقول...

بصراحة كنت أحسد المدرسين والمدرسات سابقاً على عطلة الصيف ...

وماعمري شفت تعامل مباشر بين المدرسين والطلبة إلا في أوبريت وزارة التربية الأخير الكويت لمن أحبها...

بصراحه عقبها قلت عوع من عطلة الصيف .. في جم مدرسة ياهم إنهيار عصبي وجم مدرس في حالة تشنج ... وماتوقع يوصلون سن الأربعين إلا فيهم الزهايمر وحوار مع الجدران


الحمدلله أني ماصرت مدرس

mazyona يقول...

هلا xeeeer
اي والله احمد ربك انك ماصرت مدرس
أتوقع أكثر حالات الانهيار العصبي عند المدرسين

saida.alrashdi يقول...

يقال

عش رجباً ترا عجباً

نربي اولادنا حتى يكونوا زبده تسييييييييييح بشوية حرارة

صدج موقف يضحك و يبكي فنفس الوقت

الله يعين المعلمين على هيك عقول